കൈക്കൂലിക്കേസിൽ ജയിൽ നിന്നിറങ്ങിയ മോട്ടോർ വെഹിക്കിൾ ഇൻസ്പെക്ടർക്ക് ഡ്രൈവിങ് സ്കൂൾ ഉടമകളുടെ വൻ സ്വീകരണം‌

കഴിഞ്ഞ ജനുവരി 30-നാണ് ചേർത്തലയിൽ വെച്ച് ഏജന്റ് മുഖേന 2500 രൂപ കൈക്കൂലി വാങ്ങുന്നതിനിടെ ആലപ്പുഴ വിജിലൻസ് സംഘം ബിജുവിനെ അറസ്റ്റ് ചെയ്തത്. സർവീസിൽ നിന്ന് വിരമിക്കാൻ കേവലം രണ്ട് മാസം മാത്രം ബാക്കി നിൽക്കെയായിരുന്നു ഈ നടപടി.

അഴിമതിക്കേസിൽ അറസ്റ്റിലായ ഉദ്യോഗസ്ഥനാണെങ്കിലും, ബിജുവിനെ കള്ളക്കേസിൽ കുടുക്കിയതാണെന്ന നിലപാടിലാണ് അദ്ദേഹത്തെ അനുകൂലിക്കുന്നവർ. 37 വർഷത്തെ ദീർഘമായ സർവീസിനിടെ ബിജുവിനെതിരെ ഇതുവരെ മറ്റ് പരാതികളൊന്നും ഉയർന്നിട്ടില്ലെന്ന് സ്വീകരിക്കാനെത്തിയവർ ചൂണ്ടിക്കാട്ടി. ആലപ്പുഴയിൽ നിന്ന് പ്രത്യേക ബസ്സിലാണ് ഡ്രൈവിങ് സ്കൂൾ ഉടമകളും മറ്റും കോട്ടയത്തെ ജയിൽ കവാടത്തിൽ സ്വീകരണത്തിനായി എത്തിയത്.

അഴിമതിക്കേസിൽ പ്രതിയായ ഉദ്യോഗസ്ഥന് പരസ്യമായി സ്വീകരണം നൽകിയത് സോഷ്യൽ മീഡിയയിലടക്കം വിമർശനങ്ങൾക്ക് വഴിവെച്ചിട്ടുണ്ട്.