ഫോറസ്റ്റ് ഓഫിസിലെ കഞ്ചാവ് കൃഷി; റേഞ്ച് ഓഫീസര്‍ക്ക് സ്ഥലം മാറ്റത്തിനു പുറമെ സസ്പെൻഷനും

പത്തനംതിട്ട: എരുമേലി പ്ലാച്ചേരി ഫോറസ്റ്റ് സ്റ്റേഷനിൽ വനം വകുപ്പ് ഉദ്യോഗസ്ഥർ കഞ്ചാവ് വളർത്തിയെന്ന് റിപ്പോർട്ട് നൽകിയ ഫോറസ്റ്റ് റേഞ്ച് ഓഫിസർക്ക് സ്ഥലം മാറ്റത്തിനു പുറമെ സസ്പെൻഷനും. കോട്ടയം എരുമേലി ഫോറസ്റ്റ് റേഞ്ച് ഓഫിസർ ബി ആർ ജയൻ ആണ് വനം വകുപ്പിനെ കളങ്കപ്പെടുത്തിയതിന് അന്വേഷണ വിധേയമായി സസ്പെൻഡ് ചെയ്യപ്പെട്ടത്. പ്ലാച്ചേരി ഫോറസ്റ്റ് ഓഫിസിന്റെ പിന്നാമ്പുറത്ത് രഹസ്യമായി കഞ്ചാവ് ചെടികൾ വാച്ചർ നട്ടു വളർത്തിയെന്നും ഇക്കാര്യം ഫോറസ്റ്റ് ഓഫിസിലെ ഡെപ്യൂട്ടി റേഞ്ച് ഓഫിസർ ഉൾപ്പടെ രണ്ട് ഉദ്യോഗസ്ഥർക്കും മൂന്ന് വനിതാ ബീറ്റ് ഓഫിസർമാർക്കും അറിയാമായിരുന്നു എന്നാണ് ബി ആർ ജയൻ റിപ്പോർട്ട് നൽകിയത്.