കെടാത്ത 'കനൽ‌'; മുതിർന്ന മാധ്യമപ്രവർത്തകരെ സഹകരിപ്പിച്ച് സിപിഐക്ക് പുതിയ യൂട്യൂബ് ചാനൽ

തിരുവനന്തപുരം: കമ്മ്യൂണിസ്റ്റ് പാർട്ടി ഓഫ് ഇന്ത്യ (CPI) പുതിയ യൂട്യൂബ് ചാനൽ തുടങ്ങുന്നു. 'കനൽ' എന്ന പേരിലാണ് ചാനൽ തുടങ്ങുക. ടെലഗ്രാഫ് മുൻ എഡിറ്റർ ആർ രാജഗോപാലിൻ്റെ നേതൃത്വത്തിലാണ് ഡിജിറ്റൽ ചാനൽ വരുന്നത്. പാർട്ടിയുടെ സമൂഹ മാധ്യമ ഇടപെടലിൻ്റെ ചുമതലക്കാരനായി രണ്ട് മാസം മുൻപ് ആർ രാജഗോപാൽ ചുമതലയേറ്റിരുന്നു. പാർട്ടിയുടെ ഔദ്യോഗിക വാർത്താ പ്രചാരണത്തിന് വേണ്ടിയാണ് ചാനൽ. മുഖ്യധാരാ മാധ്യമങ്ങളിൽ പാർട്ടിക്ക് വേണ്ടത്ര പരിഗണന ലഭിക്കുന്നില്ലെന്ന വിലയിരുത്തലിന്റെ കൂടി അടിസ്ഥാനത്തിലാണ് തീരുമാനം. പാർട്ടി സംസ്ഥാന സമ്മേളനത്തോടെ പുതിയ ചാനൽ പ്രവർ‌ത്തനം ആരംഭിക്കും.