'കേരളത്തിന്റെ പൊതു വികസനത്തിനൊപ്പം പുതുപ്പള്ളി എത്തിയിട്ടില്ല'; കണ്ണൂരിലെ മണ്ഡലവുമായി താരതമ്യം ചെയ്യാനാകുമോ: എം.വി ഗോവിന്ദന്‍

കോട്ടയം:  പുതിയ വെളിച്ചത്തിലേക്ക് നീങ്ങുന്ന തെരഞ്ഞെടുപ്പാണ് പുതുപ്പള്ളിയിലേതെന്ന് സിപിഎം സംസ്ഥാന സെക്രട്ടറി എം.വി ഗോവിന്ദൻ. കേരളത്തിന്റെ പൊതു വികസനത്തിനൊപ്പം പുതുപ്പള്ളി എത്തിയിട്ടില്ല എന്ന് എം വി ഗോവിന്ദൻ ആരോപിച്ചു. കണ്ണൂരിലെ ഏതെങ്കിലും ഒരു മണ്ഡലവുമായി പുതുപ്പള്ളിയെ താരതമ്യം ചെയ്യാനാകുമോ എന്നും അദ്ദേഹം ചോദിച്ചു. വരും ദിവസങ്ങളിൽ കേരളത്തിൽ നടന്ന വികസനവും നടക്കാൻ പോകുന്ന വികസനവും മണ്ഡലത്തിൽ ചർച്ച ചെയ്യും. ചർച്ചക്ക് മന്ത്രിമാരും നേതൃത്വം നൽകുമെന്നും അദ്ദേഹം പറഞ്ഞു. പുതുപ്പള്ളിയിൽ എല്‍ഡിഎഫ് സംഘടിപ്പിച്ച ജെയ്ക്ക് സി തോമസിന്‍റെ തെരഞ്ഞെടുപ്പ് കൺവെൻഷൻ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.