തിരുവനന്തപുരം നഗരത്തിൽ വാഹനമിടിച്ച് പരിക്കേറ്റ് കിടന്ന കാട്ടുപന്നിയെ വെടിവെച്ച്‌ കൊന്ന് കുഴിച്ചുമൂടി

ദേശീയപാത ബൈപ്പാസിൽ ആക്കുളത്തിന് സമീപം കുഴിവിളയിലാണ് പുലർച്ചെ നടക്കാൻ ഇറങ്ങിയ നാട്ടുകാർ പരിക്കേറ്റ് കിടന്ന കാട്ടുപന്നിയെ കണ്ടത്. തുടർന്ന് വനം വകുപ്പിനെ വിവരമറിയിച്ചിട്ടും എത്തിയിരുന്നില്ല. റാപിഡ് റെസ്പോൺസ് ടീം (RRT) മറ്റൊരു ജോലിയിൽ ആണെന്നും അത് കഴിഞ്ഞാൽ മാത്രമേ എത്തുകയുള്ളൂ എന്നും അറിയിച്ചു.

തുടർന്നാണ് നഗരസഭ ഷൂട്ടറെ എത്തിച്ച് വെടിവെച്ച് കൊല്ലാൻ തീരുമാനിച്ചത്. ദേശീയപാതയിലെ മധ്യഭാഗത്തെ ഡിവൈഡറിൽ കിടന്ന കാട്ടുപന്നിയെ വെടിവയ്ക്കാൻ പൊലീസ് അനുവദിച്ചില്ല. രാഹുൽ ഗാന്ധിയുടെ റൂട്ടും ജനക്കൂട്ടവും മൂലം പോലീസിന് അനുമതി നല്കാൻ കഴിയുമായിരുന്നില്ല.

12 മണിയോടെ സ്ഥലത്തെത്തിയ വനം വകുപ്പ് ജീവനക്കാർ പന്നിയെ നഗരസഭാ വാഹനത്തിലേക്ക് എത്തിച്ചു. തുടർന്ന് പൗണ്ട്കടവിലെ ആളൊഴിഞ്ഞ പ്രദേശത്ത് എത്തിച്ച് വെടിവച്ച് കൊന്ന് മറവ് ചെയ്തു. നഗരപ്രദേശത്ത് കാട്ടുപന്നി എത്തിയതെങ്ങനെ എന്ന കാര്യത്തിൽ ആർക്കും ഉത്തരമില്ല.