മലയാള കലാഗ്രാമത്തിലെ പൈതൃക ചിത്രമായ നടരാജ താണ്ഡവത്തിന് 25 വയസ്

രണ്ട് വര്‍ഷത്തിലേറെ സമയമെടുത്ത് രചന പൂര്‍ത്തിയാക്കിയ ചിത്രം മലയാള കലാഗ്രാമത്തിൻ്റെ അകംഭിത്തിയില്‍ നിറഞ്ഞു നില്‍ക്കുന്നു. പ്രകൃതിദത്തമായ നിറങ്ങള്‍ ഉപയോഗിച്ച് പരമ്പരാഗത ശൈലിയില്‍ വരച്ച ചിത്രത്തിന് 9 അടി ഉയരവും 11 അടി നീളവുമുണ്ട്. വനിതകളെ കൂടി ഉള്‍പ്പെടുത്തി തയ്യാറാക്കിയ കേരളത്തിലെ ആദ്യത്തെ ചുമര്‍ ചിത്രമാണ് നടരാജ താണ്ഡവം. 'മുയാലകന്‍' എന്ന അസുരന് മേല്‍ പരമേശ്വരന്‍ നടത്തുന്ന ബ്രഹ്‌മാനന്ദതാണ്ഡവമാണ് ഈ ചിത്രത്തിൻ്റെ പ്രമേയം. താണ്ഡവത്തോടൊപ്പം പ്രദോഷന്യത്ത സങ്കല്‍പ്പവും ഈ ചിത്രം ഉള്‍ക്കൊള്ളുന്നുണ്ട്.

നൃത്തം ചെയ്യുന്ന ശിവന് പതിനാറ് കൈകളാണ്. അലൗകികത്വം നല്‍കുന്നതിന് വേണ്ടിയാണ് കൈകളുടെ ഈ വിവൃദ്ധി. പ്രതീകാര്‍ത്ഥത്തോടു കൂടിയതാണ് ഈ ആയുധങ്ങളും സംഗീതോപകരണങ്ങളുമെല്ലാം. ശിവൻ്റെ ചുവന്ന ജടയുടെ വികിരണമാണ് ഈ നടരാജ ചിത്രത്തിൻ്റെ മറ്റൊരു പ്രത്യേകത. വിവിധതരം പൂക്കള്‍ കൊണ്ട് അലംകൃതമായ ശിവൻ്റെ ചെഞ്ചടയുടെ ഒരിഴയില്‍ ഒരു ചെറിയ ശിവതം സ്ഥാനം പിടിച്ചിട്ടുണ്ട്. അനന്തന്‍, വാസുകി, തക്ഷകന്‍, കാര്‍ക്കോടകന്‍, ശംഖന്‍, കാളിയന്‍, പദ്മന്‍, മഹാപദ്മന്‍ തുടങ്ങിയ അഷ്ട നാഗങ്ങളേയും ചെഞ്ചടയുടെ അലങ്കാരങ്ങളില്‍ ഉള്‍പ്പെടുത്തിയിട്ടുണ്ട്.