കോട്ട മറിച്ച് ജനീഷ്; ഈ വരുന്നത് മലയോര മേഖലയുടെ പ്രതിനിധി

ശക്തമായ ത്രികോണ പോരാട്ടമാണ് കോന്നിയിൽ കണ്ടതെങ്കിലും, ജനങ്ങൾക്കിടയിലെ സ്വീകാര്യതയും തദ്ദേശീയൻ എന്ന നിലയിലുള്ള പ്രതിച്ഛായയുമാണ് ജനീഷ് കുമാറിന് വിജയമൊരുക്കിയത്. മലയോര മേഖലയായ സീതത്തോട് പഞ്ചായത്തിലെ പ്രതിനിധിയെന്ന നിലയിൽ പ്രവർത്തനമാണ് പൊതുരംഗത്ത് ജനീഷ് കുമാറിനെ ശ്രദ്ധേയനാക്കിയത്. കോൺഗ്രസിന്‍റെ കുത്തകവാർഡിൽനിന്ന് ജയിച്ചുകയറിയ ജനീഷ് കുമാർ, പൊതുജനപങ്കാളിത്തത്തോടെ  ഏറ്റെടുത്ത പ്രവർത്തനങ്ങൾക്ക് രാഷ്ട്രീയത്തിന് അതീതമായ പിന്തുണ ലഭിച്ചിരുന്നു. 2010ലെ തദ്ദേശതെരഞ്ഞെടുപ്പിൽ കേരളത്തിലെ തന്നെ ഏറ്റവും വലിയ ഭൂരിപക്ഷത്തിലാണ് അന്ന് കോൺഗ്രസിന്‍റെ പ്രമുഖ നേതാവായ പഞ്ചായത്ത് പ്രസിഡന്‍റിനെ ജനീഷ് തോൽപ്പിച്ചത്.