കാലാവസ്ഥാ വ്യതിയാനം ചെറുക്കാൻ 'മഴയറിവ്': എറണാകുളം ജില്ലയിൽ മഴമാപിനി സ്ഥാപിക്കൽ തുടങ്ങി

കാലാവസ്ഥാ വ്യതിയാനത്തെ ചെറുക്കുന്നതിനായി പ്രാദേശിക സമൂഹത്തെ സജ്ജമാക്കുക എന്ന ലക്ഷ്യത്തോടെ നടപ്പിലാക്കുന്നതാണ് 'മഴയറിവ്' മഴമാപിനി സ്ഥാപിക്കൽ. ഹരിതകേരളം മിഷൻ ജില്ലാ കോർഡിനേറ്റർ എസ് രഞ്ജിനി ഉദ്ഘാടനം നിർവഹിച്ചു. രാമമംഗലം പഞ്ചായത്തിൽ സിഡിഎസിൻ്റെ ഏകോപനത്തിൽ അഡ്വക്കേറ്റ് ജേക്കബ് കെ എബ്രഹാമിൻ്റെ വസതിയിൽ വെച്ചാണ് പരിപാടി സംഘടിപ്പിച്ചത്. ചടങ്ങിൽ മഴമാപിനി യൂണിറ്റ്, ജില്ലാ കോർഡിനേറ്റർ, മഴമാപിനി സ്ഥാപിക്കുന്ന ജെൻഡർ റിസോഴ്സ് പേഴ്സൺ ലാലി ഗോപാലന് കൈമാറി. കാലാവസ്ഥയെ സൂക്ഷ്മമായി പഠിക്കാനും, മാറ്റങ്ങളുമായി പൊരുത്തപ്പെട്ട് മുന്നോട്ടുപോകാനും ശേഷിയുള്ള ഒരു സമൂഹത്തെ വളർത്തിയെടുക്കുക എന്നതാണ് പദ്ധതിയുടെ പ്രധാന ലക്ഷ്യം. ജനകീയ പങ്കാളിത്തത്തോടെ മഴമാപിനികൾ സ്ഥാപിച്ച് മഴയുടെ അളവ് രേഖപ്പെടുത്തുന്നതിലൂടെ പ്രാദേശികമായുണ്ടാകുന്ന മഴയുടെ ഏറ്റക്കുറച്ചിലുകൾ പഠിക്കാനും, തദ്ദേശ സ്ഥാപന തലത്തിൽ അതനുസരിച്ചുള്ള പദ്ധതികൾ ആസൂത്രണം ചെയ്യാനും സാധിക്കും.