ദേശീയ പാലിയേറ്റീവ് ദിനാചരണം വേറിട്ടതാക്കി അങ്കമാലി: നാടിൻ്റെ കാവൽക്കാരായ ആശാ പ്രവർത്തകരെ ആദരിച്ചു

ദേശീയ പാലിയേറ്റീവ് ദിനാചരണത്തോടനുബന്ധിച്ച് അങ്കമാലി നിയോജകമണ്ഡലത്തിലെ മുഴുവന്‍ ആശാ പ്രവര്‍ത്തകരേയും പാലിയേറ്റീവ് രംഗത്ത് സേവനമനുഷ്ഠിക്കുന്ന ജീവനക്കാരേയും റോജി എം. ജോണ്‍ എം.എല്‍.എയുടെ നേത്യത്വത്തില്‍ ആദരിച്ചു. അങ്കമാലി ബ്ലോക്ക് പഞ്ചായത്ത് ഹാളില്‍ സംഘടിപ്പിച്ച ചടങ്ങ് എം.എല്‍.എ. ഉദ്ഘാടനം ചെയ്തു. ഇരുന്നൂറോളം വരുന്ന ആശാ പ്രവര്‍ത്തകരേയും, പാലിയേറ്റീവ് ജീവനക്കാരേയും ചടങ്ങില്‍ വച്ച് പൊന്നാട അണിയിച്ച് ആദരിച്ചു. പൊതു ജനങ്ങളുടെ പ്രത്യേകിച്ച് സ്ത്രീകളുടേയും കുട്ടികളുടേയും ആരോഗ്യ സംബന്ധമായ വിഷയങ്ങളുമായി ബന്ധപ്പെട്ട് പ്രവര്‍ത്തിക്കാന്‍ ദേശീയ ആരോഗ്യ മിഷന്‍ രൂപം കൊടുത്ത അടിസ്ഥാന തലത്തിലുള്ള സന്നദ്ധപ്രവര്‍ത്തകരായ ആശമാരുടെ പ്രവര്‍ത്തനം വിസ്മരിക്കാനാവാത്തതാണ്. കോവിഡ് മഹാമാരിയുടെ സമയത്ത് ആരോഗ്യ പ്രതിസന്ധി നേരിട്ടപ്പോള്‍ തുച്ഛമായ വേതനത്തില്‍ പണിയെടുക്കുന്ന ആശമാരുടെ പ്രവര്‍ത്തനങ്ങളിലൂടെയാണ് നമ്മള്‍ വിജയകരമായി പിടിച്ച് നിന്നത്.