കുളത്തൂപ്പുഴയിലെ ബാലകനേ ! പരശുരാമൻ പ്രതിഷ്ഠിച്ച അഞ്ച് അയ്യപ്പക്ഷേത്രങ്ങളിൽ ഒന്നായ ബാലശാസ്താ ക്ഷേത്രം

ജാതിമത സങ്കല്പങ്ങൾക്കപ്പുറം എല്ലാ മനുഷ്യരും ഭക്തിയോടെ വരികയും മീനൂട്ട് നടത്തുകയും ചെയ്യുന്ന പ്രസിദ്ധമായ ക്ഷേത്രമാണ് കുളത്തൂപ്പുഴ ശ്രീ ബാലശാസ്ത്ര ക്ഷേത്രം. മനുഷ്യഹത്യ എന്ന പാപത്തിന് പരിഹാരമായി പരശുരാമൻ തന്നെ പ്രതിഷ്ഠ നടത്തിയ അഞ്ച് അയ്യപ്പക്ഷേത്രങ്ങളിൽ ഒന്നാണീ ക്ഷേത്രമെന്നാണ് സങ്കല്പം. ക്ഷേത്രത്തിന് ചുറ്റും കിഴക്കൻ മലനിരകൾ കാണാം. ഇതിൻ്റെ ഒരു ഭാഗത്തുകൂടി കല്ലടയാർ ഒഴുകുന്നു. ശ്രീ ധർമ്മശാസ്താവിനെ ബാലകൻ്റെ രൂപത്തിൽ പ്രതിഷ്ഠിച്ചിരിക്കുന്ന അപൂർവം ക്ഷേത്രമാണിത്. കുളത്തുപ്പുഴയാറ്റിലെ ക്ഷേത്രകടവിലുള്ള മത്സ്യങ്ങൾ 'തിരുമക്കളെന്നാണ്' അറിയപ്പെടുന്നത്. രോഗങ്ങൾ അകലുവാനായി മീനുകൾക്ക് ഊട്ട് നൽകുന്ന പതിവുണ്ട്. പ്രത്യേകിച്ചും, ത്വക്ക് രോഗങ്ങൾ തുടങ്ങിയ തീനങ്ങൾ മാറുന്നതിനായി ഇവിടുത്തെ മീനൂട്ട് പ്രസിദ്ധമാണ്. പണ്ട് രാസക്രീഡയിൽക്കൂടി വശീകരിക്കാൻ ശ്രമിച്ച ഒരു ജലകന്യകയെ ശാസ്താവ് മത്സ്യരൂപത്തിൽ കിടന്നുകൊള്ളാൻ അനുവദിച്ചതായിട്ടാണ് ഐതിഹ്യം.