പ്രതീക്ഷ പങ്കിടാൻ ഒരുമിച്ചു – കൊല്ലത്ത് സൊലസ് വോളണ്ടിയർ മീറ്റ്

ആദ്യഘട്ടത്തിൽ 15 കുട്ടികൾക്ക് മാത്രമേ സൊലസ് പിന്തുണ നൽകിയിരുന്നുള്ളൂ, എന്നാൽ ആ എണ്ണം അതിവേഗം വളർന്നു. ഈ സന്നദ്ധ കൂട്ടായ്മ ലോകമെമ്പാടുമുള്ള ഉദാരമതികളായ വ്യക്തികളുടെയും, കോർപ്പറേഷനുകളുടെയും പിന്തുണയോടെ, മാരകമായ രോഗങ്ങളാൽ ബുദ്ധിമുട്ടുന്ന കുട്ടികളുള്ള കുടുംബങ്ങൾക്ക് ആവശ്യമായ സാമ്പത്തിക ആരോഗ്യ സാമൂഹികമായ  പിന്തുണയും സഹായങ്ങളും നൽകിവരുന്നു. ദുരിതമനുഭവിക്കുന്ന കുട്ടിക്ക് ഏറ്റവും മികച്ച വൈദ്യചികിത്സ ലഭ്യമാക്കുന്നതിന് വേണ്ടിയുള്ള സഹായങ്ങൾ, കുട്ടികൾക്ക് പ്രതിമാസം അവരുടെ മരുന്നുകളുടെ ചിലവുകൾ എന്നിവയും നൽകുന്നു. കൂടാതെ കുട്ടിയെ ചികിത്സയ്ക്കായി ആശുപത്രിയിലേക്ക് കൊണ്ടുപോകുന്നതിന് യാത്രയും താമസവും നൽകുന്നു. സേവന സന്നദ്ധരായ ഒരു കൂട്ടം വോളണ്ടിയർമാരുടെ ഹോം കെയർ സന്ദർശനങ്ങൾ സൊലസ് പതിവായി സംഘടിപ്പിക്കുന്നു. ആ വിലയിരുത്തലിൻ്റെ അടിസ്ഥാനത്തിൽ അവർക്ക് ഏതു നിലയിലുള്ള പിന്തുണ നൽകണമെന്ന് തീരുമാനിക്കുന്നു. അതുവഴി അവർ ഒറ്റയ്ക്കല്ല എന്ന തോന്നൽ അവർക്ക് ഉണ്ടാകുന്നു. കീമോതെറാപ്പി, റേഡിയേഷൻ തെറാപ്പി എന്നിവയ്‌ക്കായി കാൻസർ രോഗികൾക്ക് സഹായം നൽകുന്നു.

ദുരിതബാധിതരായ കുട്ടിയുടെ സഹോദരങ്ങൾക്ക് ആവശ്യമായ വിദ്യാഭ്യാസ സഹായങ്ങൾ നൽകി വരുന്നു. മാസം തോറും ഭക്ഷണ കിറ്റുകൾ വിതരണം ചെയ്യുന്നു, മഴക്കാലത്ത് അവരുടെ വീടുകളുടെ മേൽക്കൂരകൾ നന്നാക്കുന്നത് പോലുള്ള അറ്റകുറ്റപ്പണികൾ നടത്തുന്നതിൽ കുടുംബങ്ങൾക്ക് സഹായങ്ങൾ ചെയ്തു വരുന്നു. മാതാപിതാക്കളെ, പ്രത്യേകിച്ച് അമ്മമാരെ ശാക്തീകരിക്കുന്നതിനായി തൊഴിലധിഷ്ഠിത പഠന ക്ലാസ് സംഘടിപ്പിക്കുന്നു. ഇപ്പോൾ, കാൻസർ, തലസീമിയ, സെറിബ്രൽ പാൾസി, നെഫ്രോട്ടിക് സിൻഡ്രോം, ഹീമോഫീലിയ, ഹൃദ്രോഗങ്ങൾ, ഫിറ്റ്സ്, വിൽസൺസ് രോഗം, ബുദ്ധിപരമായ വൈകല്യം, ജുവനൈൽ ആർത്രൈറ്റിസ്, അപസ്മാരം, കേൾവിക്കുറവ് തുടങ്ങിയ രോഗങ്ങളുള്ള അയ്യായിരത്തിഅറുന്നിറലധികം കുട്ടികളിലേക്ക് സൊലസിൻ്റെ പിന്തുണ വ്യാപിച്ചിരിക്കുന്നു.