Onam 2024: അയ്മനത്ത് ഉത്രാടത്തിന് കരുതലിന്റെ ഉപ്പേരിഓണം

അയ്മനം കേന്ദ്രമായി പ്രവർത്തിക്കുന്ന 'മനസ്സ്' എന്ന സംഘടനയിൽ നിന്ന് ഉപ്പേരി വാങ്ങിക്കൊണ്ടാണ് അഭയം ക്ഷേത്ര ഉത്സവത്തിന്റെ ഏഴാം ദിവസം ഇത്തരത്തിൽ ഒരു പരിപാടി നടത്തുന്നത്. 'മനസ്സ്' വിൽക്കുന്ന ഉപ്പേരിയുടെ ലാഭം ഗ്രാമത്തിലെ നിർധനരെ സഹായിക്കാനാണ് ഉപയാഗിക്കുന്നത്.

ഇത് മനസിലാക്കിയ അഭയം വോളണ്ടിയർമാർ 'മനസ്സ്' പ്രവർത്തകർ തയാറാക്കിയ ഉപ്പേരി വാങ്ങി ഉത്സവത്തിന് എത്തുന്നവർക്ക് ചെറിയ പായ്ക്കറ്റിൽ ഓണസമ്മാനമായി നൽകാൻ തീരുമാനിക്കുകയായിരുന്നു. അഭയം വോളണ്ടിയർമാരാണ് ഉപ്പേരി ഓണം പ്രവർത്തനങ്ങൾക്ക് നേതൃത്വം നൽകുന്നത്. ഇന്നലെ വൈകുന്നേരത്തോടെ ഉപ്പേരി വാങ്ങി പായ്ക്ക് ചെയ്ത് കഴിഞ്ഞു.

കോട്ടയം ജില്ലയാകെ പ്രവർത്തിക്കുന്ന അഭയം പ്രവർത്തകർ മറ്റൊരു സംഘടനയുടെ സന്നദ്ധപ്രവർത്തനങ്ങൾക്ക് കൈത്താങ്ങായി മാറുകയാണ് ഇതിലൂടെയെന്ന് അഭയം ലോക്കൽ സമിതി ചെയർമാൻ പ്രമോദ് ചന്ദ്രൻ പറഞ്ഞു. കഴിഞ്ഞ ഒരാഴ്ചയായി ലോക്കൽ സമിതി കൺവീനർ കെ എൻ ശശിയുടെ നേതൃത്വത്തിൽ അഭയം ഹെൽപ്പ് ഡെസ്ക് പ്രവർത്തിച്ചു വരികയാണ്.

ഭക്തജനങ്ങൾക്കാവശ്യമായ വൈദ്യസഹായവും പ്രാഥമിക ശുശ്രൂഷ സംവിധാനവും ഹെൽപ്പ് ഡെസ്ക്കിൽ ക്രമീകരീകരിച്ചിട്ടുണ്ട്. പ്രഗൽഭരായ ഡോക്ടർമാരുടേയും നേഴ്സ്മാരുടേയും വോളന്റിയർമാരുടേയും സേവനം ലഭ്യമാണ്. ഭക്തജനങ്ങൾക്ക് സൗജന്യചുക്ക് കാപ്പി വിതരണവും കുടിവെള്ള വിതരണവും സജ്ജീകരിച്ചിട്ടുണ്ട്.