കോഴിക്കോട് മെഡിക്കൽ കോളേജിന് 98 കോടിയുടെ വികസന സമ്മാനം; പുതിയ പദ്ധതികൾ നാടിന് സമർപ്പിച്ചു

കേരളത്തിലെ ആരോഗ്യ മേഖലയുടെ കരുത്ത് ഈ രംഗത്തെ കൂട്ടായ പ്രവർത്തനങ്ങളാണെന്ന് ആരോഗ്യ, വനിതാ ശിശു വികസന വകുപ്പ് മന്ത്രി വീണാ ജോര്‍ജ്. കോഴിക്കോട് ഗവ. മെഡിക്കല്‍ കോളജ്, ദന്തല്‍ കോളേജ്, കോളജ് ഓഫ് നേഴ്സിംഗ് എന്നിവിടങ്ങളില്‍ പ്രവൃത്തി പൂര്‍ത്തീകരിച്ച വിവിധ പദ്ധതികളുടെ ഉദ്ഘാടനവും ശിലാസ്ഥാപനവും നിര്‍വഹിക്കുകയായിരുന്നു മന്ത്രി. 98 കോടി രൂപയുടെ പുതിയ വികസന പ്രവൃത്തികളാണ് മെഡിക്കല്‍ കോളജില്‍ ഉദ്ഘാടനം ചെയ്തത്. തെറ്റായ പ്രചരണങ്ങള്‍ക്കിടയിലും സാധാരണക്കാരൻ്റെ ആശ്രയമായി സര്‍ക്കാര്‍ ആരോഗ്യ കേന്ദ്രങ്ങള്‍ നിലകൊള്ളുന്നതായി മന്ത്രി പറഞ്ഞു. ഇതിന് ഉദാഹരണമാണ് കോഴിക്കോട് മെഡിക്കല്‍ കോളജില്‍ മാത്രം നടന്ന പ്രാഥമിക ആന്‍ജിയോ പ്ലാസ്റ്റിയുടെ എണ്ണം. 1500 ആന്‍ജിയോ പ്ലാസ്റ്റികള്‍ ഉള്‍പ്പെടെ 5000-ല്‍ അധികം കാര്‍ഡിയോളജിക്കല്‍ പ്രൊസീജിയറുകളാണ് ഇവിടെ നടന്നതെന്നും മന്ത്രി പറഞ്ഞു.