ബസിൽ ഉറങ്ങിപ്പോയ അമ്മയ്ക്കും കുഞ്ഞിനും കാവലായി KSRTC; 17 കിലോമീറ്റർ തിരികെ ഓടിച്ച് ജീവനക്കാർ

എറണാകുളം വൈറ്റിലയിൽ നിന്നുമാണ് യുവതിയും കുഞ്ഞും ബസിൽ കയറിയത്. മലപ്പുറം വളാഞ്ചേരിക്കടുത്തുള്ള ചങ്കുവെട്ടിയിലായിരുന്നു ഇവർക്ക് ഇറങ്ങേണ്ടിയിരുന്നത്. എന്നാൽ യാത്രയ്ക്കിടയിൽ അമ്മയും കുഞ്ഞും ഉറങ്ങിപ്പോയി. ചങ്കുവെട്ടി സ്റ്റോപ്പ് കഴിഞ്ഞ് ബസ് ഏറെ ദൂരം മുന്നോട്ട് പോയ ശേഷമാണ് തങ്ങൾ ഇറങ്ങേണ്ട സ്ഥലം കഴിഞ്ഞുപോയ വിവരം യുവതി അറിയുന്നത്.

‌ഈ സമയം ഹൈവേയിലൂടെ ബസ് ഏറെ ദൂരം പിന്നിട്ടിരുന്നു. സാധാരണ ഗതിയിൽ ഹൈവേയിൽ വണ്ടി തിരിക്കുക പ്രായോഗികമല്ല. ആദ്യം ഇവരെ മറ്റേതെങ്കിലും ബസിൽ കയറ്റിവിടാൻ ശ്രമിച്ചെങ്കിലും അർധരാത്രിയായതിനാൽ വണ്ടികളൊന്നും ലഭിച്ചില്ല. തുടർന്ന് മറ്റ് യാത്രക്കാരുടെ കൂടി സമ്മതത്തോടെ ബസ് തിരിക്കാൻ ജീവനക്കാർ തീരുമാനിച്ചു.

ഏതാണ്ട് 17 കിലോമീറ്ററോളം സഞ്ചരിച്ചാണ് ഇവരെ ഇറങ്ങേണ്ട സ്റ്റോപ്പിലെത്തിച്ചത്. ചങ്കുവെട്ടിയിൽ ഇവരെ കാത്ത് യുവതിയുടെ സഹോദരൻ എത്തിയിരുന്നു. സുരക്ഷിതമായി അവരെ ഏൽപ്പിച്ച ശേഷമാണ് ബസ് യാത്ര തുടർന്നത്.

Summary: In a touching act of humanity, the crew of a KSRTC Super Fast Premium bus went the extra mile—quite literally—to ensure the safety of a mother and her young child. The duo, who boarded the bus from Vyttila, was headed to Changuvetti in Malappuram but accidentally fell asleep and missed their stop at midnight. By the time the woman realized they had overshot the destination, the bus had traveled several kilometers ahead on the highway.