സ്ത്രീവിരുദ്ധ പരാമർശം; രമേശ് പിഷാരടിക്കെതിരെ മഹിള മോർച്ച പരാതി നൽകി

പാലക്കാട് വടക്കന്തറയിൽ വച്ച് തിരഞ്ഞെടുപ്പ് പ്രചരണത്തിനെത്തിയ രമേശ് പിഷാരടിയെ തടഞ്ഞതിന് ബിജെപി കൗൺസിലർക്കെതിരെ കേസെടുത്തിരുന്നു. ഇതിന്റെ അന്വേഷണം പുരോ​ഗമിക്കുന്നതിനിടെയാണ് മഹിള മോർച്ചയുടെ പരാതി. സ്ത്രീവിരുദ്ധ പരാമർശം നടത്തുന്ന വ്യക്തി പൊതുരം​ഗത്ത് ഉണ്ടാകുന്നത് ശരിയല്ലെന്നും നടപടി സ്വീകരിക്കണമെന്നും പരാതിയിൽ പറയുന്നുണ്ട്.

രഞ്ജിത്തിനെതിരായ കേസിൽ മാദ്ധ്യമങ്ങളുടെ ചോദ്യത്തിന് 'പീഡനമൊക്കെ ഓരോരുത്തരുടെ വ്യക്തിപരമായ കാര്യമാണ്, അതിൽ താൻ അഭിപ്രായം പറയുന്നത് ശരിയല്ല' എന്നാണ് പിഷാരടി പറഞ്ഞത്. ഇത് സ്ത്രീവിരുദ്ധ പരാമർശമാണെന്നാണ് മഹിളമോർച്ചയുടെ വാദം. ബലാത്സം​ഗങ്ങളെ വ്യക്തിപരമായി ചിത്രീകരിക്കുന്നത് ബലാത്സം​ഗത്തിനിരയായ യുവതികളെയും സ്ത്രീത്വത്തെയും അവഹേളിക്കുന്നതാണെന്നും മഹിള മോർച്ചയുടെ പരാതിയിൽ പറയുന്നു.

തിരഞ്ഞെടുപ്പ് പ്രചാരണത്തിനിടെ രമേശ് പിഷാരടിയെ തടഞ്ഞ സംഭവത്തിൽ കഴിഞ്ഞ ദിവസമാണ് ബിജെപി പ്രവർത്തകർക്കെതിരെ കേസെടുത്തത്. ന​ഗരസഭയിലെ ബിജെപി അം​ഗമായ സിന്ധു രാജനും ബന്ധുക്കളായ രണ്ട് പേർക്കെതിരെയുമാണ് കേസ്.