മറ്റാരുണ്ട് LDF അല്ലാതെ! നിയമസഭാ തിരഞ്ഞെടുപ്പിനെ നേരിടാൻ ടാ​ഗ് ലൈൻ

സിപിഎം ഫെയ്‌സ്ബുക്ക് പേജിലൂടെ പുറത്തിറക്കിയ എൽഡിഎഫിന്റെ പുതിയ തിരഞ്ഞെടുപ്പ് പ്രചാരണ മുദ്രാവാക്യം വികസന നേട്ടങ്ങളെ മുൻനിർത്തിയുള്ളതാണ്. 'മറ്റാരുണ്ട് എൽഡിഎഫ് അല്ലാതെ' എന്ന പ്രധാന വാചകത്തോടൊപ്പം വയനാട് ടൗൺഷിപ്പ്, അതിദാരിദ്ര്യ നിർമ്മാർജ്ജനം, ലൈഫ് മിഷൻ ഭവനപദ്ധതി, തൊഴിലവസരങ്ങൾ, പട്ടയ വിതരണം, ലോകോത്തര നിലവാരത്തിലുള്ള സർക്കാർ ആശുപത്രികൾ തുടങ്ങി സർക്കാർ നടപ്പിലാക്കിയ വിവിധ ജനക്ഷേമ പദ്ധതികൾ ചേർത്തുകൊണ്ടാണ് മുദ്രാവാക്യം പുറത്തിറക്കിയിരിക്കുന്നത്.

കഴിഞ്ഞ നിയമസഭാ തിരഞ്ഞെടുപ്പുകളിൽ എൽഡിഎഫ് ഉയർത്തിയ മുദ്രാവാക്യങ്ങൾ ഏറെ ജനശ്രദ്ധയാകർഷിച്ചിരുന്നു. 2016-ൽ 'എൽഡിഎഫ് വരും എല്ലാം ശരിയാകും' എന്ന മുദ്രാവാക്യവുമായാണ് മുന്നണി ഭരണത്തിലെത്തിയത്. തുടർന്ന് 2021-ൽ 'ഉറപ്പാണ് എൽഡിഎഫ്' എന്ന മുദ്രാവാക്യമുയർത്തി രണ്ടാം പിണറായി സർക്കാരും അധികാരമേറ്റു.

ഇത്തവണത്തെ തിരഞ്ഞെടുപ്പ് പ്രചാരണത്തിന് മുഖ്യമന്ത്രി പിണറായി വിജയൻ തന്നെ നേതൃത്വം നൽകുമെന്ന് സിപിഎം ജനറൽ സെക്രട്ടറി എം.എ. ബേബി നേരത്തെ വ്യക്തമാക്കിയിരുന്നു.