'മഴയുണ്ടെങ്കിൽ അവധി തലേദിവസം പ്രഖ്യാപിക്കണം'; കുട്ടികളെ ബുദ്ധിമുട്ടിലാക്കരുതെന്ന് മന്ത്രി വി ശിവൻകുട്ടി

കനത്ത മഴയെ തുടർന്ന് സംസ്ഥാനത്ത് ഇന്ന് മൂന്ന് ജില്ലകളിൽ അവധി പ്രഖ്യാപിച്ചിട്ടുണ്ട്. എറണാകുളം, കാസർഗോഡ്, ആലപ്പുഴ ജില്ലകളിലാണ് ഇന്ന് അവധി പ്രഖ്യാപിച്ചത്. എന്നാൽ ആലപ്പുഴയിലെ അവധി പ്രഖ്യാപനം ഇന്ന് രാവിലെയാണ് ഉണ്ടായത്. ഈ സാഹചര്യത്തിലാണ് മന്ത്രിയുടെ ഇടപെടലുണ്ടായത്.

കാസർകോട്ട് മരം വീണ് വിദ്യാർഥി മരിച്ച സംഭവം നിർഭാഗ്യകരമാണെന്ന് മന്ത്രി പറഞ്ഞു. മഴ മുന്നൊരുക്കത്തിന്റെ ഭാഗമായി സ്കൂളുകളിലെ അപകടകരമായ മരങ്ങള്‍ മുറിച്ച്‌ മാറ്റിയിരുന്നു. കാസര്‍കോട്ടെ സ്കൂളില്‍ കടപുഴകിയ മരം അപകടമായ അവസ്ഥയിലുള്ള മരങ്ങളുടെ കൂട്ടത്തിലല്ലായിരുന്നുവെന്ന് മന്ത്രി പറഞ്ഞു. മരിച്ച കുട്ടിയടക്കം പിന്നിലെ ഗേറ്റ് വഴിയാണ് ഇറങ്ങിയത്. കുട്ടിയുടെ പിതാവുമായി സംസാരിച്ചിരുന്നുവെന്നും സാധ്യമായ എല്ലാ സഹായവും സര്‍ക്കാര്‍ കുടുംബത്തിനായി ചെയ്യുമെന്നും മന്ത്രി അറിയിച്ചു.