Munambam| മുനമ്പം വിഷയം: യുഡിഎഫിലും ലീഗിലും വ്യത്യസ്ത സ്വരങ്ങൾ; ഒറ്റക്കെട്ടെന്ന് വി.ഡി. സതീശൻ

മുനമ്പം ഭൂമി വിഷയത്തിൽ വ്യത്യസ്ത സ്വരങ്ങളുമായി മുസ്ലിംലീഗ് നേതാക്കൾ രംഗത്ത് വന്നതോടെ വെട്ടിലായി യുഡ‍ിഎഫ്. മുനമ്പം ഭൂമി വഖഫ് ഭൂമിയാണെന്ന് ഉറപ്പിച്ചുപറയാതെ സമവായ ശ്രമങ്ങളുമായി മുന്നോട്ടുപോകുന്ന നിലപാടായിരുന്നു മുസ്ലിം ലീഗ് അധ്യക്ഷൻ പാണക്കാട് സാദിഖലി ശിഹാബ് തങ്ങളും പി കെ കുഞ്ഞാലിക്കുട്ടിയും സ്വീകരിച്ചത്. എന്നാല്‍, കെ എം ഷാജിയും ഇ ടി മുഹമ്മദ് ബഷീറും മുനമ്പത്തേത് വഖഫ് ഭൂമിയാണെന്ന് ഉറപ്പിച്ചുപറഞ്ഞു. മുനമ്പത്തേത് വഖഫ് ഭൂമി അല്ലെന്നാണ് പ്രതിപക്ഷ നേതാവ് വി ഡി സതീശനും കോൺഗ്രസ് നേതാക്കളും പറയുന്നത്. മുനമ്പം വിഷയത്തിൽ രാഷ്ട്രീയമായി പരിക്കേൽക്കാതിരിക്കാൻ തന്ത്രപരമായി കോൺഗ്രസ് മുന്നോട്ടുപോകുമ്പോൾ, ലീഗിനുള്ളിൽ ഉയർന്ന ഭിന്നസ്വരം യുഡിഎഫിന് തലവേദനയായിട്ടുണ്ട്. പ്രതിപക്ഷം മുൻകൈയെടുത്താരംഭിച്ച സമവായ ശ്രമങ്ങൾക്കും മതസൗഹാർദത്തിനും തുരങ്കംവക്കുന്നതാണ് ലീഗിലെ ഒരു വിഭാഗം നേതാക്കളുടെ പ്രതികരണമെന്ന വിലയിരുത്തലിലാണ് കോൺഗ്രസ്. മുനമ്പം വിഷയത്തില്‍ യുഡിഎഫ്, ലീഗ് നേതാക്കള്‍ പറഞ്ഞത് എന്താണെന്ന് നോക്കാം.