Onam 2025: ഐശ്വര്യവും സമൃദ്ധിയും നിറഞ്ഞ് മലയാളിക്കിന്ന് തിരുവോണം; പ്രധാന ഓണാഘോഷങ്ങൾ

ചിങ്ങമാസത്തിലെ അത്തം മുതൽ തിരുവോണം വരെയുള്ള പത്തു ദിവസങ്ങളിലാണ് വീടുകളിൽ അത്തപ്പൂക്കളം ഒരുക്കുന്നത്. ആദ്യത്തെ മൂന്ന് ദിവസങ്ങളിൽ, അതായത് അത്തം, ചിത്തിര, ചോതി ദിവസങ്ങളിൽ, ചാണകം മെഴുകിയ തറയിൽ തുമ്പപ്പൂവ് മാത്രം ഉപയോഗിച്ചാണ് അത്തം ഇടുക. പിന്നീടുള്ള ദിവസങ്ങളിൽ വിവിധതരം പൂക്കൾ ഉപയോഗിക്കുന്നു. ആദ്യദിവസം ഒരു നിര പൂക്കൾ മാത്രവും, ചുവന്ന പൂക്കൾ ഒഴിവാക്കിയും തുടങ്ങുന്നു. രണ്ടാം ദിവസം രണ്ടിനം പൂക്കളും, മൂന്നാം ദിവസം മൂന്നിനം പൂക്കളും എന്നിങ്ങനെ ഓരോ ദിവസവും പൂക്കളത്തിന്റെ വലുപ്പം വർധിച്ചുവരുന്നു. ചോതി നാൾ മുതലാണ് അത്തത്തിൽ ചെമ്പരത്തിപ്പൂക്കൾ പൂക്കളത്തിൽ ഉപയോഗിക്കുന്നത്. ചിലയിടങ്ങളിൽ ഒരു നിറത്തിലുള്ള പൂവിൽ തുടങ്ങി പത്താം ദിവസം പത്ത് നിറങ്ങളിലുള്ള പൂക്കൾ ഉപയോഗിച്ച് പൂക്കളം പൂർത്തിയാക്കുന്നു. ഉത്രാടദിനത്തിലാണ് ഏറ്റവും വലിയ പൂക്കളം ഒരുക്കുന്നത്. മൂലം നാളിൽ പൂക്കളം ചതുരാകൃതിയിൽ നിർമ്മിക്കണം എന്നാണ് പരമ്പരാഗതമായ രീതി.

തിരുവോണച്ചടങ്ങുകളിൽ ഏറ്റവും പ്രധാനപ്പെട്ടത് തൃക്കാക്കര ക്ഷേത്രത്തിൽ മഹാബലി ചക്രവർത്തിയെ വരവേൽക്കുന്ന ചടങ്ങാണ്. വാമനന്റെ കാൽപാദം പതിഞ്ഞ ഭൂമി എന്ന അർത്ഥത്തിലാണ് 'തൃക്കാൽക്കര' എന്ന പേരുണ്ടായതെന്ന് ഐതിഹ്യം സൂചിപ്പിക്കുന്നു. വാമനപ്രതിഷ്ഠയുള്ള ഏക പുരാതന കേരള ക്ഷേത്രം തൃക്കാക്കരയാണ്.

ഓണത്തോടനുബന്ധിച്ച് കുട്ടികൾക്കും മുതിർന്നവർക്കും പുതിയ വസ്ത്രങ്ങൾ (കോടിവസ്ത്രം) വാങ്ങി നൽകുന്ന ഒരു ചടങ്ങ് കേരളത്തിലുടനീളം നിലവിലുണ്ട്. കുട്ടികൾക്കായി വാങ്ങുന്ന ചെറിയ മുണ്ടിനെ ഓണമുണ്ട് എന്ന് വിളിക്കുന്നു. സാധാരണയായി കൈത്തറിയിൽ നെയ്ത കസവുകരയുള്ള ഒറ്റമുണ്ടാണ് ഇതിനായി ഉപയോഗിക്കുന്നത്.

തൃശൂർ ജില്ലയുടെ തെക്കൻ ഭാഗങ്ങളിൽ തിരുവോണദിവസം തൃക്കാക്കരയപ്പനെ ഒരുക്കുന്ന പതിവുണ്ട്. പാലക്കാട് പ്രദേശങ്ങളിൽ ഇത് ഉത്രാടം നാളിൽ തുടങ്ങുന്നു. മഹാബലിയെ വരവേൽക്കാൻ വീടിന്റെ മുറ്റത്തോ ഇറയത്തോ ആണ് തൃക്കാക്കരയപ്പനെ ഒരുക്കുന്നത്. അരിമാവ് ഉപയോഗിച്ച് കോലം വരച്ച് അതിന് മുകളിൽ കളിമണ്ണുകൊണ്ട് നിർമ്മിച്ച രൂപങ്ങൾ (തൃക്കാക്കരയപ്പൻ) പ്രതിഷ്ഠിക്കുന്നു. ഇതിനെ 'ഓണം കൊള്ളുക' എന്നും പറയുന്നു.

പാട്ടക്കാരനായ കുടിയാൻ ജന്മിയുമായുള്ള കരാറിന്റെ ഭാഗമായി നിർബന്ധമായും നൽകേണ്ടിയിരുന്ന ഒരു കാഴ്ചയായിരുന്നു ഓണക്കാഴ്ച. ഇതിൽ പ്രധാനപ്പെട്ടത് വാഴക്കുലയായിരുന്നു. ഏറ്റവും മികച്ച കുലയാണ് കാഴ്ചക്കുലയായി നൽകിയിരുന്നത്. കാഴ്ച സമർപ്പിക്കുന്ന കുടിയാന്മാർക്ക് ജന്മിമാർ ഓണക്കോടിയും സദ്യയും നൽകിയിരുന്നു. ഈ സമ്പ്രദായം കുടിയാൻ-ജന്മി ബന്ധത്തിന്റെ നല്ല ഓർമ്മകൾ പുതുക്കുന്ന ഒന്നായി ഇന്നും നിലനിൽക്കുന്നു. എന്നാൽ ഇന്ന് ഈ കാഴ്ചകൾ ക്ഷേത്രങ്ങളിലേക്ക് സമർപ്പിക്കപ്പെടുന്നു. ഗുരുവായൂർ ക്ഷേത്രത്തിലെ കാഴ്ചക്കുല സമർപ്പണം വളരെ പ്രസിദ്ധമാണ്.

ഓണാഘോഷങ്ങളുടെ പ്രധാന ആകർഷണമാണ് ഓണസദ്യ. കാളൻ, ഓലൻ, എരിശ്ശേരി എന്നിവയാണ് പരമ്പരാഗതമായ ഓണസദ്യയിലെ പ്രധാന വിഭവങ്ങൾ. അവിയലും സാമ്പാറും പിന്നീട് കൂട്ടിച്ചേർത്തതാണ്. നാല് തരം ഉപ്പിലിട്ടവയാണ് സാധാരണയായി വിളമ്പാറ്. കടുമാങ്ങ, നാരങ്ങ, ഇഞ്ചിപ്പുളി, ഇഞ്ചിതൈര്. ഇടത്തരം വലുപ്പമുള്ള പപ്പടമാണ് ഉപയോഗിക്കുന്നത്. 10 പലക്കാരൻ, 12 പലക്കാരൻ എന്നിങ്ങനെ പപ്പടത്തിന് കണക്കുണ്ട്. നാല് തരം ഉപ്പേരികൾ (ചേന, പയർ, വഴുതനങ്ങ, പാവക്ക) ശർക്കരപുരട്ടി, പഴനുറുക്ക്, പഴം, പാലട, പ്രഥമൻ എന്നിവയും സദ്യയിൽ ഉൾപ്പെടുത്തുന്നു.