ഇടത്-വലത് കണക്കുകൾ തെറ്റിച്ച് നിലമ്പൂരിൽ അൻവർ എഫക്ട്; ഒറ്റയാൾ പോരാട്ടത്തിൽ നേടിയത് 19,760 വോട്ടുകൾ

അൻവറിന്റെ മികച്ച മുന്നേറ്റം പുതിയ രാഷ്ട്രീയ ചർച്ചകൾക്കും തിരികൊളുത്തി. പിണറായിസത്തിനെതിരെ പോർമുഖം തുറന്ന് എൽഡിഎഫ് വിട്ട അൻവറിനെ മുന്നണിയിൽ എടുക്കാത്തതിൽ കോൺഗ്രസിനുളളിലും മുസ്ലിം ലീഗിലും നേരത്തെ തന്നെ അതൃപ്തിയുണ്ട്. പുതിയ വോട്ട് കണക്കുകൾ മുന്നണി പ്രവേശന ചർച്ചകളുടെ ചൂട് കൂട്ടും. അൻവറിന്റെ മുന്നണി പ്രവേശനം സംബന്ധിച്ച് പ്രതിപക്ഷ നേതാവ് പ്രതികരിക്കാൻ തയാറായില്ലെങ്കിലും അൻവറിന് വാതിൽ തുറക്കണമെന്ന അഭിപ്രായം കോൺഗ്രസിനുള്ളിൽ ഉയരുമെന്ന സൂചനയുള്ള പ്രതികരണങ്ങളാണ് മറ്റു നേതാക്കളുടേത്.