ശബരിമല എല്ലാവരുടേയും, ഇരുമുടിക്കെട്ടില്ലാതെയും പോകാമെന്ന് ഹൈക്കോടതി

ശബരിമല എല്ലാവരുടേയുമാണ്, ഇരുമുടിക്കെട്ടില്ലാതെയും ശബരിമലയ്ക്ക് പോകാം. പതിനെട്ടാം പടിയിലൂടെ കയറാന്‍ മാത്രമേ ഇരുമുടിക്കെട്ട് ആവശ്യമുള്ളു. അല്ലാത്തവര്‍ക്ക് നേരെ എതിര്‍വശത്തുള്ള നടയിലൂടെ സന്നിധാനത്തേക്ക് കടക്കാവുന്നതാണ്. ശബരിമല ദര്‍ശനം സംബന്ധിച്ച് ഈ കീഴ് വഴക്കം നിലനിന്നു പോരുന്നതാണ്.

നാനാജാതിമതസ്ഥര്‍ക്കും കടന്നുവരാവുന്ന ഇടമാണ് ശബരിമലയെന്ന് ചൂണ്ടിക്കാട്ടിയ കോടതി ഹർജിയിൽ അതൃപ്തി പ്രകടിപ്പിക്കുകയും ഹർജി തള്ളുകയും ചെയ്തു. സന്നിധാനം വാവര് സ്വാമിയുടെ ഹൃദയം ഇരിക്കുന്ന ഇടമാണെന്നും കോടതി അഭിപ്രായപ്പെട്ടു. ശബരിമലയിൽ വിശ്വാസികളെ മാത്രമേ പ്രവേശിപ്പിക്കാവു എന്ന ഹർജി നൽകിയതിന് ടിജി മോഹൻദാസിന്റെ കോടതി വിമർശിച്ചു.കേരളത്തിന്റെ മതേതരത്വത്തെ തകർക്കുന്ന സ്വഭാവമുള്ളതാണ് ഹർജിയെന്നും കോടതി വ്യക്തമാക്കി.

ശബരിമലയിൽ ദർശനം നടത്തുന്നതിന് സുരക്ഷ ഒരുക്കണമെന്ന നാലു യുവതികൾ സമർപ്പിച്ച ഹർജിയും ഹൈക്കോടതി തീര്‍പ്പാക്കി. സുരക്ഷയാവശ്യപ്പെട്ട് ആദ്യം കോടതിയെ സമീപിച്ചത് അപക്വമെന്ന് നിരീക്ഷിച്ച കോടതി, സുരക്ഷ ആവശ്യപ്പെട്ട് ആദ്യം പൊലീസിനെ സമീപിക്കണമായിരുന്നുവെന്നും ചൂണ്ടിക്കാട്ടി.