ദേശത്തിൻ്റെ കാവലാളായി തിട്ടമംഗലം മഹാവിഷ്ണു; വട്ടിയൂർക്കാവ് വഴി പോകുമ്പോൾ ഈ പുണ്യകേന്ദ്രം സന്ദർശിക്കാം

ശക്തിസ്വരൂപനായ ശ്രീമഹാവിഷ്ണു പ്രധാന പ്രതിഷ്ഠയായ ഇവിടെ ഉപദേവതകളായി ശ്രീമഹാഗണപതിയും ഇഷ്ടവരദായിനിയായ ദേവിയും നാഗരാജാവും കുടികൊള്ളുന്നു. ഭക്തജനങ്ങൾക്കായി വിശാലമായ അന്നദാനമണ്ഡപവും ക്ഷേത്രങ്കണത്തിൽ സജ്ജീകരിച്ചിട്ടുണ്ട്. ക്ഷേത്രത്തിലെ വാർഷിക ഉത്സവമായ തൃക്കൊടിയേറ്റ് മഹോത്സവം മകരമാസത്തിൽ ആറു ദിവസങ്ങളിലായി അതിഗംഭീരമായി ആഘോഷിക്കുന്നു.

ക്ഷേത്രതന്ത്രി ബ്രഹ്മശ്രീ അരയാൽ കീഴില്ലത്ത് കേശവൻ നമ്പൂതിരിയുടെ മുഖ്യ കാർമ്മികത്വത്തിൽ കൊടിയേറി ആറാം നാൾ ആറാട്ടോടുകൂടി ഉത്സവം സമാപിക്കുന്നു. ഉത്സവത്തിൻ്റെ അഞ്ചാം ദിവസമാണ് ഭക്തിനിർഭരമായ പാൽപായസ പൊങ്കാലയും പള്ളിവേട്ടയും നടക്കുന്നത്. ആറാം ദിവസം വൈകുന്നേരം ആറാട്ടിനായി പുറപ്പെടുന്ന ഭഗവാൻ ദേശപ്രദക്ഷിണത്തിന് ശേഷം മടങ്ങിയെത്തുന്നതോടെ തൃക്കൊടിയിറക്കി ചടങ്ങുകൾ പൂർത്തിയാകുന്നു.

കളഭാഭിഷേകം, പുഷ്പാഭിഷേകം, നാഗരൂട്ട്, ഭഗവതി സേവ തുടങ്ങിയ വിശേഷാൽ പൂജകളും വിവിധ കലാപരിപാടികളും ഉത്സവത്തിൻ്റെ ഭാഗമായി നടക്കാറുണ്ട്. മീനമാസത്തിലെ പ്രതിഷ്ഠാദിനവും മേടമാസത്തിലെ വിഷുമഹോത്സവവും ക്ഷേത്രത്തിലെ പ്രധാന ആഘോഷങ്ങളാണ്.