വേനൽച്ചൂടിനെ പ്രതിരോധിക്കാം: വിളസംരക്ഷണത്തിന് പുതിയ നിർദ്ദേശങ്ങളുമായി വെള്ളായണി കാർഷിക കോളേജ്

വെള്ളായണി ദക്ഷിണമേഖല കാർഷിക ഗവേഷണ കേന്ദ്രവും ഭാരതീയ കാലാവസ്ഥാ വകുപ്പും സംയുക്തമായാണ് ഈ സംവിധാനം ഒരുക്കിയിരിക്കുന്നത്. കാലാവസ്ഥാ വ്യതിയാനത്തിനനുസരിച്ച് കൃഷിരീതികളിൽ മാറ്റം വരുത്താനും വിളകളെ സംരക്ഷിക്കാനും കർഷകരെ സഹായിക്കുകയാണ് ഈ ബുള്ളറ്റിൻ്റെ പ്രധാന ലക്ഷ്യം. മഴ മുന്നറിയിപ്പിനൊപ്പം തന്നെ വേനൽച്ചൂടിനെ പ്രതിരോധിക്കാനുള്ള നിർദ്ദേശങ്ങളും അധികൃതർ നൽകിയിട്ടുണ്ട്.

വേനലിൽ കാർഷികവിളകളുടെ സംരക്ഷണത്തിനായി പ്രത്യേക നിർദ്ദേശങ്ങളും കോളേജ് നൽകുന്നുണ്ട്. ഈർപ്പം നിലനിർത്തുന്നതിനായി ചെടികളുടെ ചുവട്ടിൽ ജൈവവസ്തുക്കൾ ഉപയോഗിച്ച് പുതയിടുകയോ ചകിരിച്ചോർ കമ്പോസ്റ്റ് ഉപയോഗിക്കുകയോ ചെയ്യണം. തെങ്ങ്, കവുങ്ങ്, റബ്ബർ തുടങ്ങിയ വൃക്ഷവിളകളെ സൂര്യാഘാതത്തിൽ നിന്ന് സംരക്ഷിക്കുന്നതിനായി തായ്തടിയിൽ കുമ്മായം പൂശുന്നത് ഉചിതമായിരിക്കും.

ചെറിയ തൈകൾക്ക് തെങ്ങോല ഉപയോഗിച്ച് തണൽ നൽകണമെന്നും കർഷകർക്ക് നൽകിയ നിർദ്ദേശത്തിൽ പറയുന്നു. കാലാവസ്ഥാ സാഹചര്യങ്ങൾ കൃത്യമായി മനസ്സിലാക്കി കൃഷി പരിപാലനം നടത്തുന്നത് വിളനാശം കുറയ്ക്കാൻ സഹായിക്കും.