ഇടനിലക്കാരുടെ ചൂഷണമില്ലാതെ കർഷകർക്ക് ആശ്വാസമായി ജില്ലയിലെ കർഷക ചന്തകൾ

ഓണം ഉൾപ്പെടെയുള്ള കേരളത്തിൻ്റെ തനത് ആഘോഷങ്ങൾ എത്തുന്നതോടെ അന്യസംസ്ഥാനങ്ങളിൽ നിന്നുള്ള പഴം, പച്ചക്കറി വരവ് കുത്തനെ ഉയരും. കുറച്ചു വർഷങ്ങൾക്കു മുൻപ് നാം പൂർണ്ണമായും അന്യസംസ്ഥാനങ്ങളെ പച്ചക്കറിക്കും പൂവിനുമൊക്കെ ആശ്രയിച്ചിരുന്നു. എന്നാൽ ഇന്ന് ആ സ്ഥിതിയൊക്കെ മാറി വരുന്നുണ്ട്. പൂർണ്ണമായും നമ്മുടെ സംസ്ഥാനത്ത് തന്നെ നമുക്ക് ആവശ്യമുള്ള പച്ചക്കറിയും പഴവർഗ്ഗങ്ങളും ഉത്പാദിപ്പിക്കുന്നു എന്നല്ല. ശുഭപ്രതീക്ഷ നൽകുന്ന ചില കാർഷിക മുന്നേറ്റങ്ങൾ സംസ്ഥാനത്ത് നടക്കുന്നുണ്ട്. ഓണം എത്തിയതോടെ തിരുവനന്തപുരം ജില്ലയിലെ ജൈവ പച്ചക്കറി വിപണിയും ഉണർന്നിരിക്കുകയാണ്. ജില്ലയിൽ ഉടനീളം സജീവമാകുന്ന ഓണച്ചന്തകളിൽ താരമാകുന്നത് തനത് രീതിയിൽ ഉത്പാദിപ്പിക്കുന്ന ജൈവ പച്ചക്കറികളാണ്.