കാട്ടാക്കട ഇനി 'സോളാർ സിറ്റി'; സർക്കാർ ഓഫീസുകൾ പൂർണ്ണമായും സൗരോർജ്ജത്തിലേക്ക് മാറി

ഇതോടെ സർക്കാർ സ്ഥാപനങ്ങൾ ഊർജ്ജ സ്വയം പര്യാപ്തത കൈവരിക്കുന്ന സംസ്ഥാനത്തെ ആദ്യ മണ്ഡലമെന്ന ബഹുമതി കാട്ടാക്കട സ്വന്തമാക്കുകയാണ്. പദ്ധതിയുടെ ഔദ്യോഗിക ഉദ്ഘാടനം ഫെബ്രുവരി 18 ബുധനാഴ്ച മലയിൻകീഴ് മാധവകവി സംസ്കൃതി കേന്ദ്രത്തിൽ വെച്ച് വൈദ്യുതി വകുപ്പ് മന്ത്രി കെ കൃഷ്ണൻകുട്ടി നിർവ്വഹിച്ചു.

ഐക്യരാഷ്ട്ര സംഘടനയുടെ വരെ പ്രശംസ പിടിച്ചുപറ്റിയ 'ജലസമൃദ്ധി' പദ്ധതിയിലൂടെ മഴവെള്ള സംഭരണത്തിൽ നേരത്തെ തന്നെ കാട്ടാക്കട രാജ്യാന്തര തലത്തിൽ മാതൃകയായിരുന്നു. അന്ന് ജലസമൃദ്ധിക്കായി മഴവെള്ളം സംഭരിച്ചതിന് സമാനമായി, ഇപ്പോൾ ഊർജ്ജസ്വയംപര്യാപ്തതയ്ക്കായി സൂര്യപ്രകാശത്തെ പരമാവധി പ്രയോജനപ്പെടുത്തുക എന്ന ലക്ഷ്യത്തിലേക്കാണ് മണ്ഡലം എത്തിച്ചേരുന്നത്.

ഈ നൂതന പദ്ധതി പൂർത്തിയാകുന്നതോടെ പരിസ്ഥിതി സൗഹൃദ വികസനത്തിൻ്റെ പുതിയൊരു അധ്യായം കൂടി കാട്ടാക്കടയിൽ കുറിക്കപ്പെടുകയാണ്.