മുതലപ്പൊഴി ഫിഷിങ്‌ ഹാർബറിന് പുതിയ മുഖം നൽകാനുള്ള വികസന പദ്ധതിക്ക് കേന്ദ്ര അംഗീകാരം

സംസ്ഥാന ഫിഷറീസ്‌ വകുപ്പിൻ്റെ  മുതലപ്പൊഴി ഫിഷിങ്‌ ഹാർബർ വികസന പദ്ധതി അംഗീകരിച്ചുകൊണ്ട് കേന്ദ്രസർക്കാർ ഉത്തരവായി. നരേന്ദ്ര മോദി സർക്കാർ നിഷ്കർഷിച്ച എല്ലാ മാനദണ്ഡങ്ങളും പാലിച്ചു പദ്ധതി രൂപരേഖ തയ്യാറാക്കുകയും ഇതുമായി ബന്ധപ്പെട്ട് കേന്ദ്ര ഏജൻസികളുമായി ഏകോപനം നടത്തുകയും ആവശ്യമായ റിപ്പോർട്ടുകൾ തയ്യാറാക്കുകയും ചെയ്ത ഹാർബർ എഞ്ചിനീയറിങ് വകുപ്പിൻ്റെ കൂടെ നേട്ടമാണ് പദ്ധതിക്ക് ലഭിച്ച അംഗീകാരമെന്ന് ഫിഷറീസ് വകുപ്പ് മന്ത്രി സജി ചെറിയാൻ പറഞ്ഞു. നിലവിലെ ഫിഷിങ് ഹാർബറിൻ്റെ രൂപകൽപ്പന കേന്ദ്ര ഏജൻസിയായ സെൻട്രൽ വാട്ടർ ആൻഡ്‌ പവർ റിസർച്ച്‌ സ്‌റ്റേഷനായിരുന്നു നടത്തിയത്. പക്ഷേ പൊഴിയിൽ അപകടങ്ങൾ പതിവായതിനെ തുടർന്നാണ് സംസ്ഥാന സർക്കാർ മുൻകൈയെടുത്ത് പ്രശ്നപരിഹാരത്തിനും ഫിഷിങ് ഹാർബർ വികസനത്തിനുമായി പഠനം നടത്തിയത്.