അനീഷിൻ്റെ അമ്മയ്ക്ക് സ്നേഹവീട്; ജയിൽ ഉദ്യോഗസ്ഥർ നിർമ്മിച്ച 'തണൽ' വീട് യാഥാർത്ഥ്യം

പൂജപ്പുര സെൻട്രൽ ജയിലിലെ ഡെപ്യൂട്ടി പ്രിസൺ ഓഫീസറായിരുന്ന അനീഷിൻ്റെ വേർപാടിന് പിന്നാലെ സഹപ്രവർത്തകർ ഒത്തൊരുമയോടെയാണ് ഈ പദ്ധതി നടപ്പിലാക്കിയത്. പൂർത്തിയായ വീടിൻ്റെ താക്കോൽദാന കർമ്മം കേരള മുഖ്യമന്ത്രി പിണറായി വിജയൻ നിർവ്വഹിക്കും. കഴിഞ്ഞ ഡിസംബർ 17-ന് തറക്കല്ലിട്ട വീടിൻ്റെ നിർമ്മാണം അതീവ വേഗത്തിലാണ് പൂർത്തിയാക്കിയത്. സി കെ ഹരീന്ദ്രൻ എംഎൽഎയാണ് വീടിൻ്റെ തറക്കല്ലിടൽ ഉദ്ഘാടനം ചെയ്തത്.

തൻ്റെ അവയവങ്ങളിലൂടെ മറ്റുള്ളവരിലായി ഇന്നും ജീവിക്കുന്ന അനീഷിൻ്റെ ഓർമ്മയ്ക്കായി അമ്മയ്ക്ക് സുരക്ഷിതമായൊരു തണലൊരുക്കാൻ മുന്നിട്ടിറങ്ങിയ KJSOA തിരുവനന്തപുരം മേഖല കമ്മിറ്റിയെയും ഇതിനായി സഹകരിച്ച എല്ലാ ജയിൽ വകുപ്പ് ജീവനക്കാരെയും അഭിനന്ദനങ്ങൾ കൊണ്ട് മൂടുകയാണ് നാട്. പാറശ്ശാല മണ്ഡപത്തിൻകടവ് സ്വദേശിയായിരുന്നു അനീഷ്.