തിരുവനന്തപുരം കീഴാറ്റിങ്ങലിലെ ശ്രീ ശങ്കരമംഗലം ശിവക്ഷേത്രം; കൈലാസതുല്യമായ പുണ്യസങ്കേതം

കിഴക്ക് ദർശനമായി ശ്രീ പരമേശ്വരനും പടിഞ്ഞാറ് ദർശനമായി ശ്രീ പാർവതീദേവിയും ഒരേ ശ്രീകോവിലിൽ കുടികൊള്ളുന്നു എന്നത് ഈ ക്ഷേത്രത്തിൻ്റെ വലിയ പ്രത്യേകതയാണ്. ധനുമാസത്തിലെ തിരുവാതിര നാളിലും ശിവരാത്രി മഹോത്സവദിവസങ്ങളിലും മാത്രമേ ശ്രീ പാർവതീദേവിയുടെ തിരുനട തുറന്ന് വിശേഷാൽ പുജകൾ നടത്താറുള്ളൂ എന്നതും ദക്ഷിണകേരളത്തിലെ അപൂർവ്വം ചില ക്ഷേത്രങ്ങളിൽ ഒന്നായി ഇതിനെ മാറ്റുന്നു.

ഗണപതി, ശാസ്താവ്, നാഗത്താന്മാർ എന്നിവരാണ് ക്ഷേത്രത്തിലെ ഉപദേവതകൾ. കാലപ്പഴക്കത്താൽ ജീർണ്ണാവസ്ഥയിലായിരുന്ന ക്ഷേത്രം തിരുവിതാംകൂർ ദേവസ്വം ബോർഡിൻ്റെയും ക്ഷേത്ര ഉപദേശകസമിതിയുടെയും ഭക്തജനങ്ങളുടെയും സഹകരണത്തോടെ പുനരുദ്ധരിച്ച് ഭക്തിസാന്ദ്രമായ അന്തരീക്ഷത്തിൽ നിലകൊള്ളുന്നു.

തിരുവിതാംകൂർ ദേവസ്വംബോർഡിൻ്റെ വർക്കല ഗ്രൂപ്പിൽ കീഴാറ്റിങ്ങൽ സബ്ഗ്രൂപ്പിൻ്റെ കീഴിലാണ് ക്ഷേത്രഭരണം നിർവ്വഹിക്കപ്പെടുന്നത്. ക്ഷേത്രത്തിലെ പ്രധാന ആഘോഷമായ ശിവരാത്രി വ്രതാനുഷ്‌ഠാനവും തിരുമഹോത്സവവും അഞ്ചു ദിവസങ്ങളിലായി വിപുലമായി ആഘോഷിക്കുന്നു. വിളംബര ഘോഷയാത്ര, സമൂഹസദ്യ, താലപ്പൊലി, സമൂഹപൊങ്കാല, വിവിധ കലാപരിപാടികൾ എന്നിവ ഇതിൻ്റെ ഭാഗമായി നടക്കുന്നു. ശിവരാത്രിക്ക് പുറമെ ധനുമാസത്തിലെ തിരുവാതിര, വിനായകചതുർത്ഥി, വിഷു, തുലാമാസത്തിലെ ആയില്യം, മണ്ഡ‌ലകാലം, മഹാനവമി, വിജയദശമി, തൃക്കാർത്തിക തുടങ്ങിയവയും ക്ഷേത്രത്തിൽ വിശേഷമായി ആഘോഷിക്കുന്നു.

എല്ലാ വെള്ളിയാഴ്ചകളിലും രാവിലെ ശ്രീ പാർവ്വതീദേവിക്ക് തട്ടം നിവേദ്യം, പട്ടുംതാലിയും ചാർത്തൽ, പുഷ്പാഞ്ജലി, സ്വയംവരാർച്ചന എന്നിവ നടത്താവുന്നതാണ്. നിത്യേന ഉമാമഹേശ്വരപൂജയും നടത്താം. കൂടാതെ എല്ലാ മലയാളമാസവും തിരുവാതിര നക്ഷത്രത്തിൽ ഭക്തജനങ്ങൾക്ക് ക്ഷേത്രത്തിൽ പൊങ്കാല സമർപ്പിക്കാനുള്ള സൗകര്യവുമുണ്ട്.