ബാലരാമപുരത്തെ ചൈതന്യമായി തലയൽ ക്ഷേത്രം; ഭരദ്വാജ മഹർഷി പ്രതിഷ്ഠ നടത്തിയ പുണ്യസങ്കേതം

ദ്വാപരയുഗത്തിൽ സപ്തർഷിമാരിൽ പ്രഗൽഭനായ ഭരദ്വാജ മഹർഷിയാണ് ഇവിടെ പ്രതിഷ്ഠ നടത്തിയത് എന്നാണ് ഐതിഹ്യം. മനോഹരമായ വട്ടശ്രീകോവിലോടു കൂടിയ ഈ ക്ഷേത്ര സങ്കേതത്തിൽ കൊടിമരം, നാലമ്പലം, നമസ്കാര മണ്ഡപം, വിവിധ ഉപദേവതാ ക്ഷേത്രങ്ങൾ എന്നിവയെല്ലാം ഉൾപ്പെടുന്നു. ക്ഷേത്രത്തിലെ ഏറ്റവും പ്രധാനപ്പെട്ട വിശേഷദിവസങ്ങൾ കുംഭമാസത്തിലെ മഹാശിവരാത്രിയും ധനുമാസത്തിലെ തിരുവാതിരയുമാണ്. പത്തുദിവസം നീണ്ടുനിൽക്കുന്ന വാർഷിക ഉത്സവം മഹാശിവരാത്രി നാളിൽ ആറാട്ടോടു കൂടി സമാപിക്കുന്ന രീതിയിലാണ് ചിട്ടപ്പെടുത്തിയിരിക്കുന്നത്.

തലയൽ ദേശക്കാരുടെ ദേശീയോത്സവമായി ആഘോഷിക്കപ്പെടുന്ന ഈ ദിനങ്ങളിൽ ക്ഷേത്ര തന്ത്രിയുടെ മുഖ്യകാർമ്മികത്വത്തിൽ നടക്കുന്ന തൃക്കൊടിയേറ്റോടെ ഉത്സവത്തിന് തുടക്കമാകുന്നു. ഉത്സവകാലത്ത് വിശേഷാൽ പൂജകൾ, നെറ്റിപ്പട്ടം കെട്ടിയ ഗജവീരന്മാരുടെ എഴുന്നള്ളിപ്പ്, പുഷ്പാഭിഷേകം, 108 കലശാഭിഷേകം, നാഗരൂട്ട്, പ്രദോഷപൂജ, അന്നദാനം എന്നിവ നടക്കാറുണ്ട്. കൂടാതെ വിവിധ സാംസ്കാരിക പരിപാടികളും പ്രഭാഷണങ്ങളും ഉത്സവത്തിന് മാറ്റുകൂട്ടുന്നു.

വിനായക ചതുർത്ഥി, പൂജവയ്പ്പ്, വിദ്യാരംഭം, തൃക്കാർത്തിക, മണ്ഡലകാലം, രാമായണ മാസം തുടങ്ങിയ എല്ലാ വിശേഷദിവസങ്ങളും ആചാരപരമായ ചടങ്ങുകളോടെ ഇവിടെ ആഘോഷിച്ചുവരുന്നു.