തിരുവനന്തപുരത്ത് കടലിൽ കുളിക്കുന്നതിനിടെ അപകടം പറ്റിയാൽ ഇനി ലൈഫ് ഗാർഡിനെ വേണ്ടി അലയേണ്ട; പുതിയ സംവിധാനം വന്നു

ഏറ്റവും കൂടുതൽ സഞ്ചാരികൾ എത്തുന്ന കോവളം ലൈറ്റ് ഹൗസ് ബീച്ചിൽ ആറോളം പോയിൻ്റുകളിലാണ് പുതിയ കൊടികൾ സ്ഥാപിച്ചിട്ടുള്ളത്. ലൈഫ് ഗാർഡുകളുടെ യൂണിഫോമിന് സമാനമായ ചുവപ്പും മഞ്ഞയും കലർന്ന നിറത്തിലുള്ള ഈ കൊടികൾ കടലിൽ നിൽക്കുന്നവർക്ക് ദൂരത്തുനിന്നുപോലും വ്യക്തമായി കാണാൻ സാധിക്കും. അപകടമുണ്ടായാൽ ലൈഫ് ഗാർഡുകളുടെ ശ്രദ്ധ പെട്ടെന്ന് ആകർഷിക്കാൻ ഇത് ഏറെ സഹായിക്കും. കൂടാതെ, ലൈഫ് ഗാർഡുകൾക്ക് ആദ്യമായി ഫസ്റ്റ് എയ്ഡ് കിറ്റുകളും ലഭ്യമാക്കിയിട്ടുണ്ട്.

കടൽത്തീരത്തുണ്ടാകുന്ന ചെറിയ മുറിവുകൾക്കും മറ്റ് ആരോഗ്യപ്രശ്നങ്ങൾക്കും ലൈഫ് ഗാർഡുകൾ തന്നെ ഇനി പ്രാഥമിക ചികിത്സ നൽകും. എല്ലാ ഗാർഡ് പോയിൻ്റുകളിലും ഈ കിറ്റുകൾ ലഭ്യമായിരിക്കും. ഇതിനുപുറമെ, കാലാവസ്ഥാ വ്യതിയാനം മൂലമുള്ള അപകടസാധ്യതകൾ അറിയിക്കാനും കടൽക്കുളിക്ക് അനുവദിച്ച സമയം കഴിയുമ്പോൾ സഞ്ചാരികളെ വിവരമറിയിക്കാനും സൈറണുകളും ആധുനിക മൈക്രോഫോണുകളും ബീച്ചുകളിൽ സജ്ജീകരിച്ചിട്ടുണ്ട്.