പഠനം വേറിട്ട അനുഭവമാക്കി മാറ്റാൻ വർണ്ണകൂടാരം ഒരുക്കി വിദ്യാലയങ്ങൾ

പാലോട് ബി ആർ സി യുടെ കീഴിലുള്ള കൊല്ലായിൽ ഗവ. എൽ പി സ്കൂളിൽ ആണ് എസ് എസ് കെ യുടെ ആഭിമുഖ്യത്തിലുള്ള സ്റ്റാർസ്  വർണ്ണ കൂടാരം നിർമിച്ചത്. ഡി. കെ. മുരളി എം എൽ എയാണ് പ്രീ പ്രൈമറി വിഭാഗത്തിനായി നിർമ്മിച്ച വർണ്ണ കൂടാരം ഉദ്ഘാടനം ചെയ്തത്. സ്കൂളിലെ പതിവ്  കാഴ്ചകളിൽ നിന്ന് വ്യത്യസ്തമാണ് വർണ്ണ കൂടാരം. ഇവിടെ കുട്ടികളുമായി സംവദിക്കുന്നത് മനോഹരമായ ചിത്രങ്ങളും ശില്പങ്ങളും ഒക്കെയാണ്. ചിന്താശേഷി വളർത്തുന്നതിനായി ക്ലാസ് മുറികളെ തന്നെ പ്രത്യേക ഇടങ്ങളായി സജ്ജീകരിക്കും. വരയിടവും വായനയിടവും ഒക്കെ അങ്ങനെ ഒരുങ്ങും. സ്കൂളിലേക്ക് ആണെന്ന പതിവ് ചിന്തയിൽ നിന്ന്  കളികളിലൂടെ ആശയവിനിമയത്തിൻ്റെയും പഠനത്തിൻ്റെയും ലോകത്തിലേക്ക് കുരുന്നിലെ തന്നെ കുട്ടികൾക്ക് ഉയരാനും വർണ്ണ കൂടാരങ്ങൾ സഹായകമാകും.

പെരിങ്ങമ്മല പഞ്ചായത്ത് പ്രസിഡൻ്റ് കാർത്തിക സി. പി. അദ്ധ്യക്ഷത വഹിച്ചു. ഡി പി സി ശ്രീകുമാരൻ പദ്ധതി വിശദീകരണം നടത്തി. ചടങ്ങിൽ ബ്ലോക്ക് പ്രസിഡൻ്റ് ജി കോമളം, ജില്ലാ പഞ്ചായത്തംഗം സോഫി തോമസ്, ബ്ലോക്ക് വൈസ് പ്രസിഡൻ്റ് എസ്. എം. റാസി, ബ്ലോക്ക് മെമ്പർ റിയാസ്, വാർഡ് മെമ്പർമാരായ അൻസാരി കലയപുരം, ഷിനു മടത്തറ, എ. ഇ ഒ ഷീജ, ബി. പി സി ബൈജു എസ്, പ്രധാനാധ്യാപിക ബി. വിജയലക്ഷ്മി അമ്മ തുടങ്ങിയവർ പങ്കെടുത്തു. പത്ത് ലക്ഷം രൂപ ചെലവാക്കിയാണ് പ്രീ പ്രൈമറി വിഭാഗത്തിന് വർണ കൂടാരം ഒരുക്കിയിട്ടുള്ളത്.