എയിംസ് ആലപ്പുഴയിൽ വന്നില്ലെങ്കിൽ തൃശൂരിൽ; 2026-ൽ വരുമെന്ന് പറഞ്ഞിട്ടില്ലെന്ന് സുരേഷ് ഗോപി

തൃശൂർ : കേരളത്തിൽ എയിംസ് (AIIMS) വരുന്നത് സംബന്ധിച്ച് താൻ പറഞ്ഞ കാര്യങ്ങൾ തെറ്റായി വ്യാഖ്യാനിക്കപ്പെട്ടതാണെന്ന് കേന്ദ്രമന്ത്രി സുരേഷ് ഗോപി. 2026-ൽ എയിംസ് വരുമെന്ന് താൻ പറഞ്ഞിട്ടില്ലെന്നും പദ്ധതിക്കായി ഇനിയും സമയമുണ്ടെന്നും അദ്ദേഹം വ്യക്തമാക്കി. ആലപ്പുഴയിൽ എയിംസ് വരണമെന്നത് 2016 മുതലുള്ള തന്റെ വ്യക്തിപരമായ നിലപാടാണ്. എന്നാൽ അവിടെ സ്ഥലം നൽകാൻ സാധിച്ചില്ലെങ്കിൽ തൃശൂരിൽ എയിംസ് വരും. താൻ പ്രധാനമന്ത്രിയോ ആരോഗ്യ മന്ത്രിയോ അല്ലെന്നും സ്ഥലം ലഭ്യമാക്കേണ്ടത് സംസ്ഥാന സർക്കാരാണെന്നും അദ്ദേഹം ഓർമ്മിപ്പിച്ചു. അനുയോജ്യമായ നാല് സ്ഥലങ്ങളെങ്കിലും നിർദ്ദേശിച്ചാൽ 2027-ലോ 2028-ലോ പദ്ധതി യാഥാർത്ഥ്യമാകുമെന്നും അദ്ദേഹം കൂട്ടിച്ചേർത്തു.