ആപ്പിളും വാഴപ്പഴവുമല്ല; ലോകത്തേറ്റവും പ്രോട്ടീൻ സമ്പുഷ്‌ടമായ പഴം ഏതെന്നറിയാം

100 ഗ്രാമ പേരയ്ക്കയിൽ ഏകദേശം 2.6 ഗ്രാം പ്രോട്ടീൻ അടങ്ങിയിട്ടുണ്ട്. ഇത് മിക്ക പഴങ്ങളേക്കാളും വളരെ കൂടുതലാണ്. ആപ്പിളിൽ ഏകദേശം 0.3 ഗ്രാമും വാഴപ്പഴത്തിൽ ഏകദേശം 1.1 ഗ്രാം പ്രോട്ടീനും അടങ്ങിയിരിക്കുന്നു.

വ്യായാമം ചെയ്യുന്നവർക്ക് പേശികളുടെ വീണ്ടെടുപ്പിനും, ശക്തി വർദ്ധിപ്പിക്കുന്നതിനും, ശരീരത്തിന്റെ മൊത്തത്തിലുള്ള പ്രകടനത്തിനും പ്രോട്ടീൻ നിർണായകമാണ്. പ്രോട്ടീൻ മാത്രമല്ല, നാരുകൾ, വൈറ്റമിൻ സി, മഗ്നീഷ്യം, ആന്റിഓക്‌സിഡന്റുകൾ എന്നിവയും പേരയ്ക്ക നൽകുന്നു. ഇതിലെ പ്രോട്ടീനും വൈറ്റമിൻ സിയും പേശികളെ മെച്ചപ്പെടുത്താൻ സഹായിക്കുന്നു, അതേസമയം അതിന്റെ ആന്റി-ഇൻഫ്ലമേറ്ററി ഗുണങ്ങൾ വ്യായാമത്തിനു ശേഷമുള്ള വീക്കം അല്ലെങ്കിൽ വേദന കുറയ്ക്കും.

ധാരാളം പോഷകങ്ങൾ അടങ്ങിയ പേരയ്ക്ക ഒരു സൂപ്പർഫുഡായി കണക്കാക്കപ്പെടുന്നു. ഒരു പേരയ്ക്കയിൽ ഓറഞ്ചിനേക്കാൾ കൂടുതൽ വൈറ്റമിൻ സി അടങ്ങിയിട്ടുണ്ട്. ഇത് പ്രതിരോധശേഷി വർദ്ധിപ്പിക്കുകയും ദഹനത്തിനു സഹായകമാവുകയും ചെയ്യുന്നു. ആരോഗ്യകരമായ ചർമം, തിളക്കം, പ്രായവുമായി ബന്ധപ്പെട്ട ചർമ്മ മാറ്റങ്ങളുടെ വേഗത കുറയ്ക്കൽ എന്നിവയ്ക്ക് ഉത്തമം.

പേരയ്ക്ക എപ്പോൾ വേണമെങ്കിലും കഴിക്കാം. പക്ഷേ രാവിലെയോ വ്യായാമത്തിന് ശേഷമോ പോഷകങ്ങൾ ആഗിരണം ചെയ്യുന്നത് മെച്ചപ്പെടുത്തുന്നതിന് ഇത് പ്രത്യേകിച്ചും ഗുണം ചെയ്യും. ഇത് പച്ചയ്ക്ക് കഴിക്കാം. പ്രോട്ടീനും നാരുകളും വർദ്ധിപ്പിക്കുന്നതിന് സ്മൂത്തികളാക്കി മാറ്റാം. അല്ലെങ്കിൽ അധിക രുചിക്കും പോഷകത്തിനും വേണ്ടി നാരങ്ങ, ചാറ്റ് മസാല, മാതളനാരങ്ങ എന്നിവ ചേർത്ത് സാലഡുകളിൽ ചേർക്കാം.