ഉറക്കം കുറവാണോ? തലച്ചോറിന്റെ പ്രവർത്തനങ്ങളെ ഗുരുതരമായി ബാധിക്കുമെന്ന് പുതിയ പഠനം

എലികളിലാണ് പരീക്ഷണം നടത്തിയത്. ഉറക്കം കുറവുള്ള എലികളിൽ പ്രൊട്ടക്ടീവ് പ്രോട്ടീൻ ആയ പ്ലിയോട്രോഫിനിന്റെ (pleiotrophin) അളവ് കുറഞ്ഞതായും കണ്ടെത്തി. രണ്ട് ദിവസത്തെ ഉറക്കം നഷ്ടപ്പെട്ട എലികൾ എങ്ങനെയാണ് പെരുമാറുന്നതെന്നും പുതിയ വസ്തുക്കളെ തിരിച്ചറിയുന്നതെന്നും ഗവേഷകർ വിലയിരുത്തി. ജേണൽ ഓഫ് പ്രോട്ടിയോം റിസർച്ചിലാണ് പഠനം പ്രസിദ്ധീകരിച്ചിരിക്കുന്നത്.

“ഉറക്കമില്ലായ്മയുടെ അപകടങ്ങൾ ആഴത്തിലുള്ളതാണെന്ന് ഈ പഠനം അടിവരയിട്ടു പറയുന്നു”, ഇന്ത്യൻ സൊസൈറ്റി ഓഫ് ക്രോണോമെഡിസിനിലെ എൻഡോക്രൈനോളജിസ്റ്റ് ഡോ. ശശാങ്ക് ജോഷി ടൈംസ് ഓഫ് ഇന്ത്യയോട് പറഞ്ഞു. “ആവശ്യത്തിന് ഉറക്കം ഇല്ലാത്തത് ജോലിസ്ഥലത്ത് മോശം പ്രകടനത്തിനും റോഡിൽ കൂടുതൽ അപകടങ്ങൾ ഉണ്ടാകാനുമൊക്കെ കാരണമാകും. മാത്രമല്ല ഹൃദയാഘാതത്തിനും പക്ഷാഘാതത്തിനും വരെ ഈ ഉറക്കക്കുറവ് കാരണമാകും. പല സാംക്രമികേതര രോഗങ്ങളുമായും ഇതിന് ബന്ധം ഉണ്ട്. നല്ല ആരോഗ്യം നിലനിർത്താൻ നന്നായി ഉറങ്ങുക എന്നത് ഏറെ പ്രധാനമാണ്. ദിവസം ഏഴ് മണിക്കൂറോളം ഉറങ്ങണം”, ഡോ ജോഷി കൂട്ടിച്ചേർത്തു.

ചില പ്രോട്ടീനുകളുടെ കുറവ് തലച്ചോറിന്റെ ഭാഗമായ ഹിപ്പോകാമ്പസിലെ (hippocampus) ന്യൂറോണുകളെ ബാധിക്കുമെന്നും ഡോ ജോഷി പറഞ്ഞു. പഠനം, ഓർമ എന്നിവയുമായെല്ലാം ബന്ധപ്പെട്ടിരിക്കുന്ന ഭാ​ഗമാണിത്.

സമീപ വർഷങ്ങളിൽ ഉറക്കവുമായി ബന്ധപ്പെട്ട് നിരവധി പഠനങ്ങൾ നടന്നിട്ടുണ്ട്. ഹൃദ്രോ​ഗം ഉണ്ടാകുന്നതിലെ എട്ടാമത്തെ കാരണമാണ് ഉറക്കം എന്ന് 2022-ൽ അമേരിക്കൻ ഹാർട്ട് അസോസിയേഷൻ ചൂണ്ടിക്കാണിച്ചിരുന്നു. രാത്രി മുഴുവൻ ഉറങ്ങാതിരിക്കുന്നവരുടെ തലച്ചോറിൽ അൽഷിമേഴ്‌സ് പ്രോട്ടീൻ ആയ അമിലോയിഡ് ബീറ്റ (amyloid beta) ഉത്പാദിപ്പിക്കപ്പെടുന്നു എന്നും വാഷിംഗ്ടൺ യൂണിവേഴ്‌സിറ്റി സ്‌കൂൾ ഓഫ് മെഡിസിൻ 2017-ൽ നടത്തിയ ഒരു പഠനത്തിൽ കണ്ടെത്തിയിരുന്നു.

ഉറക്കക്കുറവുള്ള ആളുകൾ ദിവസം മുഴുവൻ മന്ദഗതിയിലാകും പ്രവർത്തിക്കുന്നതെന്നും ഇവർക്ക് ഏകാഗ്രത കുറയുമെന്നും പെട്ടെന്ന് പ്രകോപിതരാകുമെന്നും ജോലികൾ നന്നായി ചെയ്യാനാകില്ലെന്നും സ്ലീപ് അപ്നിയ പോലുള്ള അസുഖങ്ങൾ ചികിത്സിക്കുന്ന പൾമണോളജിസ്റ്റായ ഡോ സലിൽ ബന്ദ്രേ പറഞ്ഞു. ചിലരുടെ വ്യക്തിബന്ധങ്ങളെ വരെ ഇത് ബാധിച്ചേക്കാമെന്നും സലിൽ ബന്ദ്രേ കൂട്ടിച്ചേർത്തു.