ഒരു ലിറ്റർ കുപ്പിവെള്ളത്തിൽ 2,40,000 ഓളം പ്ലാസ്റ്റിക് കണങ്ങൾ; ഗർഭസ്ഥ ശിശുക്കളെയും ബാധിക്കുമെന്ന് പഠനം

പുറത്തിറങ്ങുമ്പോൾ വീട്ടിൽ നിന്ന് വെള്ളം കൊണ്ടുപോകുന്നവർ വളരെ ചുരുക്കമാണ്. പൊതുവേ പുറത്തുപോയി വെള്ളം കുടിക്കാൻ ദാഹിച്ചാൽ ഉടൻ തന്നെ കുപ്പിവെള്ളത്തെ ആശ്രയിക്കുന്നവരാണ് നമ്മളിൽ ഭൂരിഭാഗവും എന്ന് തന്നെ പറയാം. എന്നാൽ നമ്മൾ വിശ്വസിച്ചു കുടിക്കുന്ന ഈ കുപ്പിവെള്ളം യഥാർത്ഥത്തിൽ ശുദ്ധമാണോ? പ്ലാസ്റ്റിക് കുപ്പികളിൽ നമ്മൾ വാങ്ങുന്ന കുടിവെള്ളത്തിൽ നമ്മൾ ഒരിക്കൽ പോലും പ്രതീക്ഷിക്കാത്തതിലും അധികം പ്ലാസ്റ്റിക്കിന്റെ അംശം അടങ്ങിയിരിക്കുന്നു എന്നാണ് പുതിയ പഠനം പറയുന്നത്. അതായത് ഒരു ലിറ്ററിന്റെ കുപ്പി വെള്ളത്തിൽ ഏകദേശം 2,40000 ഓളം പ്ലാസ്റ്റിക് കണങ്ങൾ അടങ്ങിയിരിക്കുന്നു. നാഷണല്‍ അക്കാദമി ഓഫ് സയൻസസിന്റെ പ്രൊസീഡിംഗ്സില്‍ പ്രസിദ്ധീകരിച്ച ഒരു പഠനത്തിലാണ് ഇക്കാര്യം വ്യക്തമാക്കിയിരിക്കുന്നത്. ഇവ നാനോ പ്ലാസ്റ്റിക്കുകൾ ആയതിനാലാണ് നേരത്തെ നടത്തിയ ഗവേഷണങ്ങളിലും കണ്ടെത്താൻ സാധിക്കാഞ്ഞത്.