Monkeypox | വാനര വസൂരിക്ക് ചികിത്സയുണ്ടോ? ആശ്വാസം പകരുന്ന റിപ്പോർട്ടുമായി യുകെ ഗവേഷകർ

ദ ലാൻസെറ്റ് ഇൻഫെക്ഷ്യസ് ഡിസീസ് എന്ന ജേണലിലാണ് പഠനം പ്രസിദ്ധീകരിച്ചിരിക്കുന്നത്. രോഗം ചികിത്സിക്കുന്നതിനായുള്ള രണ്ട് വ്യത്യസ്ത ആൻറിവൈറൽ മരുന്നുകളായ ബ്രിൻസിഡോഫോവിർ, ടെക്കോവിരിമാറ്റ് എന്നിവയുടെ ഉപയോഗം രോഗികളിൽ എന്ത് തരത്തിലുള്ള മാറ്റമാണ് ഉണ്ടാക്കിയിട്ടുള്ളതെന്ന് പഠനം പറയുന്നു. എന്നാൽ വസൂരിക്കെതിരെ ഉപയോഗിക്കാൻ ആദ്യമായി അംഗീകാരം ലഭിച്ചിട്ടുള്ള മരുന്ന് ടെക്കോവിരിമാറ്റാണ്. കുരങ്ങുപനിക്കെതിരെ ഈ മരുന്ന് ഫലപ്രദമാണോയെന്ന് നേരത്തെയും പരീക്ഷണങ്ങൾ നടന്നിട്ടുണ്ട്. ബ്രിൻസിഡോഫോവിറിന് രോഗികളിൽ ചെറിയ മാറ്റം വരുത്താൻ സാധിച്ചിട്ടുണ്ടെന്നാണ് പഠനത്തിൽ കണ്ടെത്തിയിട്ടുള്ളത്. ടെക്കോവിരിമാറ്റിൻെറ കാര്യത്തിൽ ഇനിയും പഠനം നടക്കേണ്ടതുണ്ട്.

Also Read-കുരങ്ങുപനി: 12ലധികം രാജ്യങ്ങളിലായി 100ഓളം കേസുകൾ; ലക്ഷണങ്ങൾ മുതൽ വാക്സിൻ വരെ; അറിയേണ്ടതെല്ലാം

വസൂരിയുടെ കുടുംബത്തിൽ പെടുന്ന രോഗമാണ് കുരങ്ങുപനി. ഈ രോഗത്തിന് ഇത് വരെ ഫലപ്രദമായ മരുന്ന് കണ്ടുപിടിച്ചിട്ടില്ല. അഞ്ച് മുതൽ 21 ദിവസം വരെയുളള ഇൻകുബേഷൻ കാലത്തിനിടയിൽ മറ്റുള്ളവരിലേക്ക് പടരാനുള്ള സാധ്യതകളെക്കുറിച്ചും പരിമിതമായ വിവരങ്ങളാണുള്ളത്. സാധാരണഗതിയിൽ നിലവിൽ രോഗികൾ സ്പെഷ്യാലിറ്റി ആശുപത്രിയിൽ ഐസൊലേഷനിൽ കഴിയുകയാണ് ചെയ്യുന്നത്.

Also Read-കുരങ്ങുപനി ലൈംഗിക ബന്ധത്തിലൂടെ പകരുമോ? അറിയേണ്ടതെല്ലാം

ടെക്കോവിരിമാറ്റ് മരുന്ന് നൽകിയ ഒരു രോഗിയിൽ രോഗലക്ഷണങ്ങൾ വളരെ പെട്ടെന്ന് കുറഞ്ഞതായി കണ്ടെത്തിയിട്ടുണ്ട്. എങ്കിലും ആൻറി വൈറൽ ചികിത്സ ഫലപ്രദമാണോയെന്ന് മനസ്സിലാക്കാൻ കൂടുതൽ പഠനം വേണമെന്ന് തന്നെയാണ് ഗവേഷകരുടെ അഭിപ്രായം. രക്തത്തിലും തൊണ്ടയിലെ സ്രവത്തിലുമാണ് കുരങ്ങുപനി വൈറസിൻെറ സാന്നിധ്യം കണ്ടെത്താറുള്ളതെന്ന് പഠനം വ്യക്തമാക്കുന്നുണ്ട്. ഈ രോഗത്തിനെതിരെ അന്താരാഷ്ട്ര തലത്തിൽ ചികിത്സാരീതികൾ ഫലപ്രദമാക്കുന്നതിന് വേണ്ടിയുള്ള പ്രാഥമിക പഠനമാണ് ഇപ്പോൾ നടന്നിരിക്കുന്നത്. മെഡിക്കൽ രംഗത്തെ പരീക്ഷണങ്ങൾക്ക് ഈ പഠനം ഏറെ ഫലപ്രദമാവുമെന്നാണ് കരുതുന്നത്. ഈ മാസമാണ് യൂറോപ്പിൽ കുരങ്ങുപനി റിപ്പോർട്ട് ചെയ്ത് തുടങ്ങിയത്. ആഫ്രിക്കയിൽ മാത്രമാണ് നേരത്തെ ഈ രോഗം ഉണ്ടായിരുന്നത്. എന്നാൽ ആഫ്രിക്കയിലേക്ക് സഞ്ചരിക്കാത്ത ആളുകൾക്ക് പോലും രോഗം എങ്ങനെ വന്നുവെന്നതിനെപ്പറ്റി കൂടുതൽ പഠനം നടന്ന് വരികയാണ്.