Sinusitis| സൈനസൈറ്റിസിനുള്ള ചികിത്സകൾ എന്തെല്ലാം?

Published by:Rajesh V
news18-malayalam

Last Updated:October 02, 2022 4:28 PM IST

സൈനസുകളിൽ ഒരു തടസ്സം ഉണ്ടാകുകയും കഫം ശരിയായ രീതിയിൽ പുറത്തേക്ക് കളയാതിരിക്കുകയും ചെയ്യുമ്പോഴാണ് സൈനസ് തലവേദന ഉണ്ടാകുന്നത്. സൈനസുകളിൽ കഫം അടിഞ്ഞുകൂടുന്നത് സമ്മർദ്ദം വർദ്ധിക്കുന്നതിനും വേദനയ്ക്കും കാരണമാകും.

Impact Shortsഗേറ്റ് വേ ഏറ്റവും പുതിയ വാർത്തയ്ക്കായി

ഇന്ത്യയിൽ ഏകദേശം 134 ദശലക്ഷം ആളുകളെ സൈനസൈറ്റിസ് ബാധിക്കുന്നുണ്ടെന്നാണ് കണക്കുകൾ. കഠിനവും വിട്ടുമാറാത്തതുമായ സൈനസൈറ്റിസ് രോഗികളുടെ ജീവിത നിലവാരത്തെ ദുർബലപ്പെടുത്തുകയും തടസ്സപ്പെടുത്തുകയും ചെയ്യും. മൂക്കിന് പിന്നിലായും കവിൾത്തടങ്ങളിലും കണ്ണുകൾക്കും നെറ്റിക്കും ഇടയിലായും ഉള്ള വായു അറകളാണ് സൈനസുകൾ. ഈ സൈനസുകളുടെ പാളിയാണ് ശ്ലേഷ്മം (MUCUS) ഉത്പ്പാദിപ്പിക്കുന്നതിന് കാരണമാകുന്നത്. വിദേശ കണങ്ങളും അണുക്കളും നാസാദ്വാരങ്ങൾ വഴി ശരീരത്തിൽ പ്രവേശിക്കുന്നതിൽ നിന്ന് സംരക്ഷിക്കുന്ന നേർത്ത ദ്രാവകമാണ് ഇത്. ഈ പാളിയുടെ വീക്കം മൂക്കിൽ അമിതമായി കഫം അടിഞ്ഞു കൂടാനും തടസ്സങ്ങൾ ഉണ്ടാകാനും കാരണണായേക്കാം. ചിലപ്പോൾ ഇത് ബാക്ടീരിയ, വൈറസ് അണുബാധകളിലേക്കും നയിച്ചേക്കാം, ഈ അവസ്ഥയെ സൈനസൈറ്റിസ് എന്ന് വിളിക്കുന്നു. സൈനസുകളിൽ ഒരു തടസ്സം ഉണ്ടാകുകയും കഫം ശരിയായ രീതിയിൽ പുറത്തേക്ക് കളയാതിരിക്കുകയും ചെയ്യുമ്പോഴാണ് സൈനസ് തലവേദന ഉണ്ടാകുന്നത്. സൈനസുകളിൽ കഫം അടിഞ്ഞുകൂടുന്നത് സമ്മർദ്ദം വർദ്ധിക്കുന്നതിനും വേദനയ്ക്കും കാരണമാകും. വിട്ടുമാറാത്ത അണുബാധ മാത്രമേ തലവേദനയ്ക്കും മുഖ വേദനയ്ക്കും കാരണമാകൂ.

Also Read- Sinusitis| സൈനസൈറ്റിസ് രോഗത്തെക്കുറിച്ച് അറിയേണ്ടതെല്ലാം

അണുബാധയുടെ അടിസ്ഥാന കാരണത്തെ അടിസ്ഥാനമാക്കിയാണ് സൈനസൈറ്റിസ് ചികിത്സിക്കുന്നത്, അണുബാധയുടെ തീവ്രതയെ അടിസ്ഥാനമാക്കി നിങ്ങളുടെ ഡോക്ടർ ഇനിപ്പറയുന്ന ചികിത്സാക്രമങ്ങൾ നിർദ്ദേശിച്ചേക്കാം.

വീട്ടുവൈദ്യം:

ഒരു ഹ്യുമിഡിഫയർ ഉപയോഗിക്കുക - നിങ്ങളുടെ ചുറ്റുമുള്ള വായു ഈർപ്പമുള്ളതാക്കാൻ ഹ്യുമിഡിഫൈയർ സഹായിക്കും. ഒറ്റരാത്രികൊണ്ട് മൂക്കിൽ ഉണ്ടാകുന്ന തടസ്സം ഒഴിവാക്കാൻ ഹ്യുമിഡിഫയർ ഉപയോഗിക്കുന്നത് വളരെ ഫലപ്രദമാണ്.

ആവി പിടിക്കുക - വെള്ളം ചൂടാക്കി ആവി പിടിക്കുകയോ ചൂടുവെള്ളത്തിൽ കുളിക്കുകയോ ചെയ്യുന്നത് നിങ്ങൾക്ക് സൈനസൈറ്റിസിന്റെ ലക്ഷണങ്ങളിൽ നിന്ന് ആശ്വാസം ലഭിക്കാൻ സഹായിക്കും. ആവി പിടിക്കുമ്പോൾ ചില കാര്യങ്ങൾ ശ്രദ്ധിക്കണം. ഇതിനായി ആദ്യം ഒരു പാത്രത്തിൽ ചൂടുവെള്ളം നിറയ്ക്കുക. നീരാവി പുറത്തേക്ക് പോകാതിരിക്കാൻ ഒരു പുതപ്പ് കൊണ്ട് തലവഴി മൂടി പാത്രത്തിലേക്ക് കുനിഞ്ഞിരുന്ന് വേണം ആവി പിടിക്കുന്നത്. തുടക്കത്തിൽ രണ്ട് നാസാരന്ധ്രങ്ങൾ വഴിയും ആവി അകത്തേക്ക് വലിച്ചെടുക്കുക, തുടർന്ന് ഒന്നടച്ച് മറ്റൊന്നിലൂടെ ആവി അകത്തേക്ക് വലിച്ചെടുത്തു കൊണ്ട് മൂക്ക് പൂർണ്ണമായും തുറന്നെന്ന് ഉറപ്പാക്കുക. അയഞ്ഞ കഫം ചുമച്ച് തുപ്പി കളയുക. മൂക്ക്ചീറ്റി തടസ്സമുണ്ടാക്കുന്ന കഫം ഒഴിവാക്കുക.

സുഗന്ധ തൈലങ്ങൾ - യൂക്കാലിപ്റ്റസ് എണ്ണ / കർപ്പൂര തൈലം (മെന്തോൾ) തുടങ്ങിയ എണ്ണകൾ സൈനസ് മൂലമുണ്ടാകുന്ന തലവേദനയ്ക്ക് ആശ്വാസം നൽകും. എന്നിരുന്നാലും, അവ അപസ്മാരത്തിന് (epilepsy) കാരണമാകുമെന്നതിന് തെളിവുകൾ ഉള്ളതിനാൽ അവ കരുതലോടെ വേണം ഉപയോഗിക്കുന്നത്. വളരെ കുറച്ച് സമയത്തേക്ക് മാത്രമേ ഉപയോഗിക്കാവൂ.

മൂക്കിലൂടെ വെള്ളം ഒഴുക്കുക/മൂക്കിലേക്ക് ഉപ്പുവെള്ളം ചീറ്റുക (saline nasal douching) - ഉപ്പുവെള്ളം മൂക്കിലൂടെ ഒഴുക്കുന്നത് സൈനസൈറ്റിസിന് ഫലപ്രദമായ വീട്ടുവൈദ്യമാണ്. മൂക്കിന്റെ ഒരു ദ്വാരത്തിലൂടെ ഒഴിക്കുന്ന ഉപ്പുവെള്ളം മറ്റേ ദ്വാരത്തിലൂടെ ഒഴുക്കി കളയുകയാണ് ഇതിൽ ചെയ്യുന്നത്. മൂക്ക് വൃത്തിയുള്ളതും ആരോഗ്യകരവുമായി നിലനിർത്തുന്നതിന്, ഏതെങ്കിലും തടസ്സങ്ങൾ ഉണ്ടെങ്കിൽ അത് നീക്കം ചെയ്യുന്നതിനായി നിങ്ങളുടെ നാസാരന്ധ്രങ്ങളിൽ ഉപ്പുവെള്ളം ചീറ്റിച്ച് ഒഴുക്കി കളയുന്ന ഒരു ലളിതമായ പ്രക്രിയയാണ് നേസൽ ഡൗച്ചിങ്. അണുബാധയ്ക്കുള്ള സാധ്യത തടയാൻ മൂക്കിലൊഴിക്കുന്നത് ശുദ്ധീകരിച്ച വെള്ളം ആണെന്ന് ഉറപ്പാക്കുക.

ചൂട് വെയ്ക്കുക - മൂക്കിനകത്തെ ഭാഗങ്ങൾ വൃത്തിയാക്കുന്നതിനുള്ള മറ്റൊരു മാർഗ്ഗമാണിത്. ഇതിനായി ഒരു ചൂടുള്ള ടവൽ ഉപയോഗിക്കാം. വിശ്രമിക്കുമ്പോഴോ ഉറങ്ങുമ്പോഴോ സൈനസ് പ്രശ്നങ്ങൾ അനുഭവപ്പെടുന്ന പ്രദേശത്ത് ഒരു ചൂടുള്ള ടവൽ വയ്ക്കുന്നതിലൂടെ കഫം അയവുള്ളതാക്കാനും മൂക്ക് തുറക്കാനും സഹായിക്കും. അങ്ങനെ സൈനസ് പ്രശ്നങ്ങളിൽ നിന്നും ആശ്വാസം നൽകാൻ ഈ മാർഗം സഹായിക്കും.

ആവശ്യത്തിന് വിശ്രമം - സൈനസൈറ്റിസ് ശരീരത്തെ നന്നായി ബാധിച്ചേക്കാവുന്ന ഒരു അവസ്ഥയാണ്. പ്രത്യേകിച്ചും വളരെ നാൾ നീണ്ടു നിൽക്കുകയാണെങ്കിൽ പല തരത്തിലുള്ള ആരോഗ്യ പ്രശ്നങ്ങൾ നിങ്ങൾക്ക് നേരിടേണ്ടതായി വരും. അതിനാൽ അസ്വസ്ഥതകൾ മാറി സുഖം പ്രാപിക്കാൻ ശരീരത്തിന് അവസരം നൽകുന്നതിന് നിങ്ങൾക്ക് ധാരാളം വിശ്രമം ലഭിക്കുന്നുണ്ടെന്ന് ഉറപ്പാക്കുക.

നേസൽ ഡീകോംഗെസ്റ്റന്റ് സ്പ്രേകൾ:

ഈ മരുന്നുകൾ മൂക്കിന് അകത്തുള്ള ഭാഗങ്ങൾ വൃത്തിയാക്കാനും സൈനസുകളിൽ നിന്ന് കഫം പുറന്തള്ളുന്നത് എളുപ്പമാക്കാനും ഉപയോഗിക്കുന്നു. എന്നാൽ, ഈ മരുന്നുകൾ വളരെ ജാഗ്രതയോടെ വേണം ഉപയോഗിക്കുന്നത്. ഹ്രസ്വകാലയളവിലേക്ക് മാത്രം ഉപയോഗിക്കുക. (സാധാരണയായി 5-7 ദിവസം വരെ)

ആന്റിബയോട്ടിക്കുകൾ:

സൈനസ് അണുബാധ ബാക്ടീരിയ അണുബാധ മൂലമാണെങ്കിൽ, ആന്റിബയോട്ടിക്കുകൾ കഴിക്കുന്നതിലൂടെ മാത്രമേ അവസ്ഥ മെച്ചപ്പെടുത്താൻ കഴിയൂ. എന്നിരുന്നാലും, ആന്റിബയോട്ടിക്കുകൾ വിവേചനരഹിതമായി ഉപയോഗിക്കുന്നത് ആന്റിബയോട്ടിക് പ്രതിരോധത്തിന് കാരണമായേക്കാം. അതിനാൽ, ആന്റിബയോട്ടിക്കുകൾ മിതമായി ഉപയോഗിക്കണം, ഡോക്ടറുടെ നിർദ്ദേശ പ്രകാരം മാത്രമായിരിക്കണം ഇവ ഉപയോഗിക്കുന്നത്.

ആന്റിഹിസ്റ്റമൈൻ:

അലർജികളെ പ്രതിരോധിക്കുന്നതിനായി ഉപയോഗിക്കുന്ന മരുന്നുകളാണ് ആന്റിഹിസ്റ്റാമൈനുകൾ. സീസണൽ അലർജി മൂലമാണ് സൈനസ് അണുബാധ ഉണ്ടാകുന്നതെങ്കിൽ, ആന്റി ഹിസ്റ്റാമൈൻ ഉപയോഗിച്ച് പ്രശ്നം പരിഹരിക്കാൻ കഴിയും. ആന്റിഹിസ്റ്റാമൈൻ അലർജി മൂലമുണ്ടാകുന്ന നീരുവീക്കം കുറയ്ക്കുകയും അണുബാധ ഉണ്ടാകുന്നത് തടയുകയും ചെയ്യും. മാത്രമല്ല, ആന്റിഹിസ്റ്റമൈനുകൾക്ക് മൂക്കിലെ സ്രവങ്ങളെ ഉണക്കാനും അടഞ്ഞ സൈനസുകളിലെ തടസ്സം നീക്കാനും കഴിയും.

Also Read- Sinus Headache Symptoms| സൈനസ് തലവേദനയുടെ ലക്ഷണങ്ങൾ എന്തെല്ലാം?

വേദനയ്ക്കുള്ള പ്രതിവിധികൾ: പനി, തലവേദന, മുഖം/ശരീര വേദന തുടങ്ങിയ ലക്ഷണങ്ങൾ ലഘൂകരിക്കുന്നതിന് വേണ്ടി പാരസെറ്റമോൾ, ഐബുപ്രുഫെൻ തുടങ്ങിയ മരുന്നുകൾ ഉപയോഗിക്കാം.

ശസ്ത്രക്രിയ:

മൂക്കിന്റെ അറകളെ വേർതിരിക്കുന്ന ഭിത്തിയായ സെപ്റ്റത്തിന്റെ (SEPTUM) വ്യതിചലനം അല്ലെങ്കിൽ മൂക്കിൽ തള്ളി നിൽക്കുന്ന ശ്ലേഷ്മ പടലം( നാസൽ പോളിപ്സ് ) പോലുള്ള ഘടനാപരമായ വൈകല്യങ്ങളുടെ കാര്യത്തിൽ ശസ്ത്രക്രിയാ ചികിത്സ ആവശ്യമായി വന്നേക്കാം.

വിവിധ തരം സൈനസ് ശസ്ത്രക്രിയകൾ:

ഫങ്ഷണൽ എൻഡോസ്കോപ്പിക് സൈനസ് ശസ്ത്രക്രിയ (Functional endoscopic sinus surgery)

ഒരു എൻഡോസ്കോപ്പ് മൂക്കിനകത്തേക്ക് കയറ്റിയാണ് ഈ രീതിയിലുള്ള ശസ്ത്രക്രിയ ചെയ്യുന്നത്. നാസൽ പോളിപ്സ് പോലുള്ള ഏതെങ്കിലും തരത്തിലുള്ള തടസ്സങ്ങൾ ഉണ്ടെങ്കിൽ അവ നീക്കം ചെയ്യാൻ ഡോക്ടർമാർ പ്രത്യേക ശസ്ത്രക്രിയാ ഉപകരണങ്ങൾ ഉപയോഗിക്കും. ശസ്ത്രക്രിയക്ക് ശേഷം പാടുകളുടെ ഒരു സൂചനയും അവശേഷിപ്പിക്കില്ല. സൈനസൈറ്റിസ് വീണ്ടും ഉണ്ടാവുകയാണെങ്കിൽ, ശസ്ത്രക്രിയ വീണ്ടും ചെയ്യേണ്ടതായി വരും.

കാൾഡ്വെൽ-ലൂക്ക് ഓപ്പറേഷൻ (Caldwell-Luc operation)

ഇത് സാധാരാണ ഉപയോഗത്തിൽ ഇല്ലാത്ത ഏറെക്കുറെ കാലഹരണപ്പെട്ട ഒരു നടപടിക്രമമാണ്, ചില പ്രത്യേക സന്ദർഭങ്ങളിൽ ഇത് ചെയ്തേക്കാം. ഈ പ്രക്രിയയിൽ, ശസ്ത്രക്രിയാ വിദഗ്ധൻ മൂക്കിനും മാക്സില്ലറി സൈനസിനും ഇടയിൽ ഒരു ഇടപാത സൃഷ്ടിക്കുകയാണ് ചെയ്യുന്നത്. ഇത് ഈ പ്രദേശത്ത് അടിഞ്ഞു കൂടുന്ന കഫം എളുപ്പത്തിൽ പുറന്തള്ളാൻ സഹായിക്കുന്നു. സൈനസ് അറയിൽ പ്രവേശിക്കുന്നതിനായി മുകളിലെ താടിയെല്ലിന്റെ പ്രീമോളാർ ഭാഗത്ത് അതായത് മുന്നിലെ പല്ലിനും അണപ്പല്ലിനും ഇടയിലുള്ള പല്ലുകളുടെ ഭാഗത്ത് മുറിവ് ഉണ്ടാക്കിയാണ് ഈ ശസ്ത്രക്രിയ നടത്തുന്നത്. കഫം നീക്കം ചെയ്യേണ്ട സൈനസ് അറയ്ക്കുള്ളിൽ എന്തെങ്കിലും വളർച്ചയുണ്ടെങ്കിൽ മാത്രമേ ഈ ശസ്ത്രക്രിയ സാധാരണയായി ശുപാർശ ചെയ്യൂ.

ജീവിതശൈലിയുടെ മാറ്റങ്ങൾ ആരോഗ്യം, ആഹാരം, സംസ്കാരം എല്ലാം അറിയാൻ News18 മലയാളത്തിനൊപ്പം വരൂ