ഇനി മാസത്തില്‍ 10 ദിവസം 'വര്‍ക് ഫ്രം ഓഫീസ്' നിര്‍ബന്ധം; ഉത്തരവുമായി ഇന്‍ഫോസിസ്

വീട്ടിലിരുന്ന് ജോലി ചെയ്യുന്നത് കുറയ്ക്കണമെന്ന് കമ്പനി അധികൃതര്‍ ജീവനക്കാര്‍ക്ക് അയച്ച ഇമെയില്‍ സന്ദേശത്തില്‍ പറയുന്നതായി 'ദി ഇക്കണോമിക് ടൈംസ്' റിപ്പോര്‍ട്ടില്‍ പറയുന്നു.

ഉടന്‍ തന്നെ നടപ്പിലാകുന്ന പുതിയ സംവിധാനത്തില്‍ (system intervention process) ഡിപ്പാര്‍ട്ട്‌മെന്റ് റിക്വസ്റ്റുകളെക്കാള്‍ പ്രോജക്ട് ആവശ്യങ്ങള്‍ക്കാണ് മുന്‍ഗണന നല്‍കുക. വീട്ടിലിരുന്ന് ജോലി ചെയ്യാനുള്ള അഭ്യര്‍ത്ഥന ഇനി ഓട്ടോമാറ്റിക്കായി അംഗീകരിക്കപ്പെടില്ല. നിലവില്‍ ജീവനക്കാര്‍ പഞ്ചിംഗിനായി ഉപയോഗിക്കുന്ന മൊബൈല്‍ ആപ്പിലൂടെയാണ് വീട്ടിലിരുന്ന് ജോലി ചെയ്യാനുള്ള അഭ്യര്‍ത്ഥനയും നല്‍കിയിരുന്നത്. എന്നാല്‍ പുതിയ സംവിധാനം പ്രാബല്യത്തിലാകുന്നതോടെ ജീവനക്കാര്‍ മാസത്തില്‍ പത്ത് ദിവസവും തങ്ങളുടെ ഓഫീസില്‍ എത്തി ഹാജര്‍ രേഖപ്പെടുത്തണം.

ജോബ് ലെവല്‍ 5 (ജെഎല്‍ 5) ഉം അതിനുതാഴെയുമുള്ള ജീവനക്കാര്‍ക്ക് ഈ നിര്‍ദേശം ബാധകമാണ്. ടീം ലീഡര്‍മാരാണ് ജെഎല്‍-5ല്‍ ഉള്‍പ്പെടുന്നത്. തൊട്ടുതാഴെ സോഫ്റ്റ് വെയര്‍ എഞ്ചീനിയര്‍മാര്‍, സീനിയര്‍ എഞ്ചീനിയര്‍മാര്‍, സിസ്റ്റം എഞ്ചീനിയര്‍മാര്‍, കണ്‍സള്‍ട്ടന്റുകള്‍ എന്നിവരാണ് ഉള്‍പ്പെടുന്നത്. ജെഎല്‍-6ല്‍ മാനേജര്‍മാര്‍, സീനിയര്‍ മാനേജര്‍മാര്‍, സീനിയര്‍ ഡെലിവറി മാനേജര്‍മാര്‍ എന്നിവര്‍ ഉള്‍പ്പെടുന്നു. 2025 മാര്‍ച്ച് 10 മുതലാണ് പുതിയ സംവിധാനം പ്രാബല്യത്തില്‍ വരിക.

കോവിഡ് വ്യാപനവും അതേത്തുടര്‍ന്നുണ്ടായ ലോക്ഡൗണിനും പിന്നാലെയാണ് പല കമ്പനികളും ജീവനക്കാര്‍ക്ക് വര്‍ക്ഫ്രം ഹോം സൗകര്യം നല്‍കിയത്. എന്നാല്‍ ജോലിയില്‍ കാര്യക്ഷമതയും ഏകോപനവും കുറഞ്ഞതോടെ ഇന്‍ഫോസിസ് ഉള്‍പ്പെടെയുള്ള ടെക് കമ്പനികള്‍ ജീവനക്കാരെ തിരികെ ഓഫീസിലെത്തിക്കാന്‍ ശ്രമം തുടങ്ങി. 2023ലാണ് ഇന്‍ഫോസിസ് ഓഫീസിലേക്ക് ജീവനക്കാരെ തിരികെയെത്തിക്കാനുള്ള നയം പ്രഖ്യാപിച്ചത്.