വരികളുടെ ആത്മാവ് ഉയിർക്കൊള്ളുന്ന ഈണങ്ങൾക്ക് ജീവൻ നൽകിയ പി കെ കേശവൻ നമ്പൂതിരി ഓർമ്മയായി

തിരുവനന്തപുരം: സംഗീതജ്ഞനും സംഗീത സംവിധായകനുമായ പി.കെ കേശവൻ നമ്പൂതിരി (85) അന്തരിച്ചു. ഞായറാഴ്ച പുലർച്ചെയായിരുന്നു അന്ത്യം. പാലക്കാട് കോങ്ങാട് സ്വദേശിയാണ് കേശവൻ നമ്പൂതിരി. കൃഷ്ണഭക്തി നിറഞ്ഞുനിൽക്കുന്ന നിരവധി ഗാനങ്ങൾക്ക് ഈണംനൽകിയ കേശവൻ നമ്പൂതിരി ഭക്തിഗാനരംഗത്ത് ഏറെ ശ്രദ്ധേയനായിരുന്നു. ഈണങ്ങളുടെ ആഴക്കടലായിരുന്നു പി.കെ. കേശവൻ നമ്പൂതിരി. അവിടെ നിന്നു കണ്ടെടുത്തതത്രയും വിലമതിക്കാനാവാത്ത രത്നങ്ങളായിരുന്നു. ഓൾ ഇന്ത്യ റേഡിയോയിൽ സംഗീത സംവിധായകനായിരുന്ന നമ്പൂതിരി ഒട്ടേറെ ലളിത ഗാനങ്ങളിലൂടെ ജനമനസ്സിൽ കുടിയേറിക്കഴിഞ്ഞിരുന്നു. അക്കാലത്താണ് പുഷ്പാഞ്ജലി എന്ന ഭക്തിഗാന ആൽബത്തിന് ഈണമേകാൻ കേശവൻ നമ്പൂതിരിക്ക് ക്ഷണം ലഭിക്കുന്നത്. എസ് രമേശൻ നായരുടെ വരികൾ.