വിഘ്നങ്ങള്‍ അകലാൻ ഭക്തർ ഗണപതിയ്ക്ക് നടത്തുന്ന ഇഷ്ട വഴിപാടുകള്‍

സിദ്ധിയുടെയും ബുദ്ധിയുടെയും ഉറവിടമായി കണക്കാക്കുന്ന ഗണപതിയെ സ്തുതിച്ചുകൊണ്ടാണ്  കർണ്ണാടക സംഗീത കച്ചേരികളും നൃത്ത അരങ്ങേറ്റങ്ങളും മറ്റും സാധാരണയായി  ആരംഭിയ്ക്കുക. വിജയദശമി ദിനത്തിൽ കുട്ടികളെ എഴുത്തിനിരുത്തുമ്പോൾ ഓം ഹരി ശ്രീ ഗണപതയേ നമഃ അവിഘ്നമസ്തു ശ്രീ ഗുരുഭ്യോ നമഃ എന്നാണ്  മലയാളികളായ ഹൈന്ദവർ ആദ്യമായി എഴുതിയ്ക്കുന്നത്.

ചിങ്ങമാസത്തിലെ വെളുത്ത പക്ഷത്തിലെ ചതുർഥി ദിവസത്തിൽ ആഘോഷിക്കപ്പെടുന്ന  വിനായക ചതുര്‍ത്ഥി ഗണപതി ഭക്തര്‍ക്ക് ഏറ്റവും പ്രധാനപ്പെട്ട ദിവസമാണ്. അന്ന് ക്ഷേത്രങ്ങളില്‍ അഷ്ടദ്രവ്യ മഹാഗണപതി ഹോമം അടക്കമുള്ള വിശേഷപ്പെട്ട ചടങ്ങുകള്‍ നടക്കാറുണ്ട്.

പുഷ്പാഞ്ജലി – കറുകയും മുക്കൂറ്റിയും കൊണ്ടുള്ള അര്‍ച്ചന ദേവതാപ്രീതിക്ക് ഏറ്റവും ഉചിതമായി കരുതുന്നു. ഗണപതി ക്ഷേത്രങ്ങളില്‍ കറുകമാല സമര്‍പ്പിക്കുന്നതു തടസ്സങ്ങള്‍ നീങ്ങുന്നതിനും മുക്കുറ്റിമാല സമര്‍പ്പിക്കുന്നതു ദാമ്പത്യഭദ്രതയ്ക്കും ഉത്തമമാണെന്നാണ് വിശ്വാസം.

അപ്പം,അട,മോദകം – ധനധാന്യ സമൃദ്ധിക്കും, ഐശ്വര്യത്തിനും തടസ്സങ്ങള്‍ ഇല്ലാതാക്കാനും ഗണപതിയുടെ ഇഷ്ട നിവേദ്യങ്ങളായ അപ്പം, അട, മോദകം എന്നിവ ക്ഷേത്രങ്ങളില്‍ വഴിപാടായി നടത്താറുണ്ട്.

നാളികേരമുടയ്ക്കല്‍ –  ഗണപതി പ്രീതിക്കായി പൊതുവായി നടത്തുന്ന വഴിപാടാണ് നാളികേരമുടയ്ക്കല്‍. ക്ഷേത്രങ്ങളില്‍ പ്രത്യേകം ക്രമീകരിച്ചിരിക്കുന്ന സ്ഥലങ്ങളില്‍ ഭക്തിപൂര്‍വ്വം തേങ്ങ ഉടയ്ക്കുന്നത് കാര്യസാദ്ധ്യത്തിനും വിഘ്ന നിവാരണത്തിനും ഉത്തമമാണ്.

അഷ്ടദ്രവ്യ മഹാഗണപതി ഹോമം – സാധാരണ ഗണപതി ഹോമങ്ങളില്‍ നിന്ന് വ്യത്യസ്തമായി 8 നാളികേരവും അഷ്ട ദ്രവ്യങ്ങളും ചേര്‍ത്ത് നടത്തുന്നതാണ് അഷ്ടദ്രവ്യ മഹാഗണപതി ഹോമം. ഇതു കൂടുതല്‍ ശ്രേഷ്ഠമെന്നു വിശ്വസിക്കപ്പെടുന്നു. കൊട്ടത്തേങ്ങ അല്ലെങ്കില്‍ ഉണങ്ങിയ നാളീകേരമാണു ഹോമത്തിന് ഉപയോഗിക്കേണ്ടത്. പഴം, കരിമ്പ്, തേന്‍, ശര്‍ക്കര, അപ്പം, മലര്‍ എന്നിവയാണ് അഷ്ടദ്രവ്യങ്ങള്‍. നാളീകേരത്തിന്റെ എണ്ണം കൂട്ടി ഗണപതി ഹോമം വലിയ രീതിയില്‍ ചെയ്യാവുന്നതാണ്. 108, 336, 1008 എന്നിങ്ങനെയാണ് നാളീകേരത്തിന്‍റെ എണ്ണം കണക്കാക്കുന്നത്.