ഒന്നു ശ്രദ്ധിച്ചാൽ ഒഴിവാക്കാം ആവർത്തിക്കപ്പെടുന്ന അപകടങ്ങൾ

2011ൽ രണ്ട് തവണയാണ് പാർവതി പുത്തനാർ മരണക്കെണിയായത്. ഫെബ്രുവരി 17ന് സ്കൂള്‍ വാൻ കരിക്കകത്തിന് സമീപം പാർവതി പുത്തനാറിലേക്ക് മറിഞ്ഞ് ആറ് കുട്ടികളും ആയയുമാണ് മരിച്ചത്. സെപ്തംബർ 26ന് കഴക്കൂട്ടത്തിനു സമീപം ചന്നന്‍കരയിൽ സ്കൂൾവാൻ പാർവതി പുത്തനാറിലേക്ക് മറിഞ്ഞ് നാല് കുട്ടികൾ മരിച്ചു. രണ്ടു സംഭവങ്ങൾക്കും സമാനതകൾ ഏറെയുണ്ട്. കനാലിനു സമീപത്തെ ഒറ്റവരി റോഡിലാണ് അപകടങ്ങൾ രണ്ടും ഉണ്ടായത്. കനാലിനെയും റോഡിനെയും വേർതിരിക്കുന്ന കലിങ്കോ വേലിയോ ഇല്ലാത്തതായിരുന്നു അപകടത്തിന് പ്രധാനകാരണം.

2012 നവംബർ 2ന് കടവന്ത്ര കേന്ദ്രീയ വിദ്യാലയത്തിലെ ഒമ്പത് കുട്ടികൾ അദ്ഭുതകരമായി രക്ഷപ്പെട്ടത് ഭാഗ്യം കൊണ്ട് മാത്രമായിരുന്നു. കുട്ടികളുമായി പോവുകയായിരുന്ന ഓട്ടോറിക്ഷ പുല്ലേപ്പടി റെയിൽവെ ഓവർബ്രിഡ്ജിന് സമീപംവെച്ച് പേരന്തൂർ കനാലിലേക്ക് മറിയുകയായിരുന്നു.

2015 ജൂൺ 26ന് സ്കൂൾ വാനിന് പുറത്തേക്ക് മരം വീണ് അഞ്ച് വിദ്യാർഥികൾ മരിക്കാനിടയായ സംഭവവും ഏറെ ഞെട്ടലുണ്ടാക്കിയതായിരുന്നു. കരുകടം വിദ്യാ വികാസ് സ്കൂളിലെ ബസാണ് അപകടത്തിൽപ്പെട്ടത്. 12 കുട്ടികളായിരുന്നു ബസിൽ ഉണ്ടായിരുന്നത്. കോതമംഗലം കുത്തുകുഴിക്ക് സമീപത്തുവെച്ചാണ് അപകടമുണ്ടായത്.

2017 ഒക്ടോബർ10ന് സാന്തോംപബ്ലിക് സ്കൂളിലെ ബസ് മറിഞ്ഞ് ഒരധ്യാപികയും സ്കൂളിലെ അറ്റൻഡന്റും മരിച്ചു. 15 ഓളം കുട്ടികൾക്ക് അപകടത്തിൽ പരുക്കേറ്റു. പെരുമ്പാവൂരിന് സമീപം വെച്ചാണ് അപകടമുണ്ടായത്.