Fact Check | നാല് വർഷം മുമ്പ് തമ്പാനൂരിൽ ഭിക്ഷക്കാരിയായി അലഞ്ഞുതിരിഞ്ഞ പൂർവ്വാധ്യാപികയെ കണ്ടെത്തിയത് ദിവ്യ എസ് അയ്യരോ?

2017 നവംബർ അഞ്ചിന് രാവിലെ പതിനൊന്ന് മണിയോടെ തിരുവനന്തപുരം(Thiruvananthapuram) തമ്പാനൂർ റെയിൽവേ സ്റ്റേഷന് മുന്നിൽ ഒരു സുഹൃത്തിനെ കാത്തുനിൽക്കുകയായിരുന്നു കുടുംബശ്രീയിൽ (Kudumbasree) ഉദ്യോഗസ്ഥയായ വിദ്യ എം.ആർ. അപ്പോഴാണ് മുഷിഞ്ഞ വസ്ത്രങ്ങളുമായി കാഴ്ചയിൽ ഒരു ഭ്രാന്തിയെപ്പോലെ തോന്നിപ്പിക്കുന്ന ഒരു വൃദ്ധ സമീപത്തെ ചെറിയ മരത്തിൽനിന്ന് കായ് പറിച്ചു കഴിക്കുന്നത് ശ്രദ്ധയിൽപ്പെട്ടത്. വിശപ്പുണ്ടോയെന്ന് ചോദിച്ച് അവരെ സമീപിച്ച വിദ്യ തൊട്ടടുത്ത കടയിൽനിന്ന് ഭക്ഷണം വാങ്ങി നൽകി. പിന്നീട് സംസാരിച്ചപ്പോഴാണ് മലപ്പുറത്തെ ഒരു സ്കൂളിൽ മുമ്പ് അധ്യാപികയായിരുന്ന വത്സലയാണ് അതെന്ന് മനസിലായത്. മക്കൾ ഉപേക്ഷിച്ചതിനെ തുടർന്നാണ് തെരുവിൽ അലയേണ്ടിവന്നതെന്നും മനസിലാക്കി. തുടർന്ന് വിദ്യ എം.ആർ ഫേസ്ബുക്കിൽ പോസ്റ്റിട്ടതിനെ തുടർന്ന് മലപ്പുറത്ത് നിന്നുള്ള വത്സലയുടെ സഹപ്രവർത്തകർ തിരിച്ചറിഞ്ഞു. പിറ്റേദിവസം വത്സല ടീച്ചറെ കണ്ടെത്തി, അന്ന് സബ് കളക്ടറായിരുന്ന ദിവ്യ എസ് അയ്യരുടെ സഹായത്തോടെ വിദ്യ തന്നെ ഒരു വൃദ്ധസദനത്തിലാക്കി. നാല് വർഷം മുമ്പ് നടന്ന ഈ സംഭവത്തിന് ഇപ്പോൾ പ്രസക്തിയെന്ത് എന്ന് ചിന്തിക്കുന്നുണ്ടാകും? അടുത്ത ദിവസങ്ങളിൽ വത്സല ടീച്ചറുടെ കഥ സമൂഹമാധ്യമങ്ങളിൽ വീണ്ടും വൈറലായി. ടീച്ചറെ തമ്പാനൂരിൽ കണ്ടെത്തിയതും ഭക്ഷണം വാങ്ങി നൽകിയതും ഇപ്പോൾ പത്തനംതിട്ട കളക്ടറായ ദിവ്യ എസ് അയ്യരായിരുന്നുവെന്ന തരത്തിലാണ് പ്രചരണം നടക്കുന്നത്. ചില ഓൺലൈൻ മാധ്യമങ്ങൾ ഇക്കാര്യം വാർത്തയാക്കുകയും ചെയ്തു. എന്നാൽ ഇപ്പോഴത്തെ പ്രചരണം തെറ്റാണെന്ന് അന്നത്തെ ഫേസ്ബുക്ക് പോസ്റ്റുകളും പത്രവാർത്തകളും നിരത്തി വിദ്യ എം.ആർ ന്യൂസ് 18നോട് പറഞ്ഞു.