വെയിലത്ത് വാടാത്ത നെല്ലും ഗോതമ്പുമുണ്ടാക്കാൻ മലയാളി; അമേരിക്കയിൽ നമ്മുടെ അഭിമാനമാകുന്ന കുമരനെല്ലൂരുകാരി

വിതയും കൊയ്ത്തും തുടങ്ങിയ കാലം മുതൽ പാടത്തിറങ്ങുന്ന ഓരോരുത്തരും ഉള്ളിൽ ചോദിച്ചിട്ടുണ്ടാകും ഈ ചോദ്യം. മാനമൊന്നു കറുത്താൽ മനസ് പെയ്തു തുടങ്ങും. വേനലൊന്നു കനത്താൽ പറയുകയേ വേണ്ട. ചാലു കീറിയും കനാൽ വെള്ളം കാത്തും പാടത്തെ നെൽചെടിക്കൊപ്പം വിട്ട പാതി മനസുമായാണ് ഓരോ കർഷകരും ജീവിക്കുക. കാലമേറെയായി ഇതിനൊരു പരിഹാരം തേടാൻ പാടത്തും ലാബിലും തലപുകച്ചിരുന്ന് ഗവേഷകർ ആലോചിച്ചു തുടങ്ങിയിട്ട്. അതിനി അധികം കാലം വേണ്ടിവരില്ല.

ഈയൊരു പ്രശ്‌നത്തിന്റെ പരിഹാരം കാണാൻ സസ്യ കോശങ്ങളിലെ ജനിതകം തന്നെയങ്ങു ഡോ. ശ്രുതി മാറ്റിയെഴുതി. സസ്യ കോശങ്ങളിലെ ലിപ്പിഡുകളെക്കുറിച്ചുള്ള പഠനമാണ് കൃഷിയിലെ ജനിതക വിപ്ലവത്തിലേക്ക് ശ്രുതിയെ എത്തിച്ചത്. ഉയർന്ന ചൂടിനെ പ്രതിരോധിക്കാൻ സസ്യങ്ങളിലെ ജീവശാസ്ത്ര പ്രതിഭാസമായ ലിപ്പിഡ് മെറ്റബോളിസത്തെ എങ്ങനെ പുതുക്കാമെന്നു പഠിച്ചു. അത് ലാബിലും പാടത്തുമായി പരീക്ഷിച്ചു.

ഉഷ്ണത്തെ മറികടക്കാൻ കഴിയുന്ന ജീൻ എല്ലാ സസ്യങ്ങളിലും ഉപയോഗിക്കാനാകുമോ എന്നായി തുടർപഠനം. ഏതാണ്ട് അഞ്ചുവർഷമെടുത്തു ഈ ഘട്ടമെത്താൻ. പന്ത്രണ്ടോ പതിനഞ്ചോ വർഷമെടുക്കുന്ന ഗവേഷണത്തിന്റെ അടുത്ത ഘട്ടം കൂടി ഇതോടെ കടന്നു. ജനിതക പ്രവർത്തനം എന്താണെന്ന് കണ്ടെത്തിയ സ്ഥിതിക്ക് ഗവേഷണം ആ നിലയ്ക്കു മുന്നേറി. കാലാവസ്ഥ എന്തായാലും കർഷകർക്ക് മനസിൽ വിചാരിച്ച വിളവു കിട്ടണം. അതു മാത്രമായിരുന്നു ഇക്കാലങ്ങളിലെല്ലാം ഡോ. ശ്രുതിയുടെ സ്വപ്നം. ഒരുതരത്തിൽ പറഞ്ഞാൽ ലോകം കാലാകാലങ്ങളായി കണ്ട സ്വപ്‌നം തന്നെയാണ് അത്. വേനലെത്ര കനത്താലും തൊണ്ടയെത്ര വരണ്ടാലും പാടത്തിറങ്ങുന്ന പച്ചമനുഷ്യന്റെ ചുണ്ടിൽ ചിരിയുണ്ടാകണമെന്നു ശ്രുതി വീട്ടിലും ലാബിലും പാടത്തുമെല്ലാമുള്ളപ്പോൾ ചിന്തിച്ചു.

അതുതന്നെയായിരുന്നു വർഷങ്ങൾ നീണ്ട ഗവേഷണത്തിന്റെ ഗതി മാറ്റിയ തിരിച്ചറിവ്. വേരുകളുടെ ആഴവും വളർച്ചയുമൊന്നും കാര്യമല്ലെന്ന് 2018ൽ തിരിച്ചറിഞ്ഞു. ചില സസ്യങ്ങൾ മണ്ണ് വരണ്ടു തുടങ്ങുമ്പോഴേ കാര്യം തിരിച്ചറിയും. അവ വേരുകൾ അതിജീവനത്തിനായി ഒരുക്കും. വേരുകളുടെ എല്ലാ ഭാഗവും സസ്യത്തിന് എപ്പോഴും ആവശ്യമില്ലാത്തതാണ്. ആവശ്യമുള്ള വേരുകൾ വേണ്ടപോലെ പ്രവർത്തിക്കും. സസ്യത്തിന് വളരാനാവശ്യമായ വെള്ളം ഇവ കണ്ടെത്തും. ഈ തിരിച്ചറിവായിരുന്നു ഗവേഷണത്തിൽ പിന്നിട്ട അടുത്ത നാഴികക്കല്ല്.

നിറയെ പാടങ്ങളും കുളങ്ങളുമുള്ള നാടാണ് കുമരനെല്ലൂർ. പഴയ പൊന്നാനി താലൂക്കിന്റെ ഭാഗം. ഇന്ന് പട്ടാമ്പി താലൂക്കിന്റെ പടിഞ്ഞാറേ അറ്റം. രണ്ടുപേരെത്തേടി ജ്ഞാനപീഠം പുരസ്‌കാരം എത്തിയ ഇന്ത്യയിലെ ഒരേ ഒരു ഗ്രാമം. എം ടി ജനിച്ച കൂടല്ലൂരും അക്കിത്തത്തിന്റെ അമേറ്റിക്കരയും കുമരനെല്ലൂരിന്റെ ഭാഗം. നിറയെ പാടങ്ങളുണ്ടായിരുന്ന ഗതകാലമുണ്ട് കുമരനെല്ലൂരിന്. കുന്നുകളും അരയാലുകളുമുണ്ടായിരുന്ന കാലം. പാടം നികത്താനും കുന്നുകൾ നിരത്താനും തുടങ്ങും മുമ്പ് ഇന്നാട്ടിൽ ജനിച്ച ശ്രുതിക്ക് പാടത്തോടും കൃഷിയോടും കുട്ടിക്കാലം മുതലേ വലിയ ഇഷ്ടമുണ്ടാവുക സ്വാഭാവികമായിരുന്നു. വിതയും കൊയ്ത്തും കണ്ടാണ് വളർന്നത്. ആ വഴി കൃഷി ശാസ്ത്രജ്ഞയിലേക്കെത്താൻ മറ്റൊന്നും വേണ്ടായിരുന്നു.

കുമരനെല്ലൂരിലെ പഠനത്തിന് ശേഷം ശ്രുതി നേരെ പോയത് തൃശൂരിലേക്ക്. വിവേകോദയം സ്‌കൂളിൽ പ്ലസ്ടു പഠനം. ഓൾ ഇന്ത്യ അഗ്രിക്കൾച്ചറൽ എൻട്രൻസിലൂടെ വെള്ളാനിക്കര കാർഷിക കോളജിൽ ബിഎസ്‌സി അഗ്രിക്കൾച്ചറിന് ചേർന്നു. നാലു വർഷത്തെ കോഴ്‌സ് കഴിഞ്ഞശേഷം കുറച്ചു നാൾ പട്ടാമ്പി നെല്ലു ഗവേഷണ കേന്ദ്രത്തിൽ ഫാം ഓഫീസറായി ജോലി നോക്കി. പിന്നാടായിരുന്നു അമേരിക്കയിലേക്കു പറന്നത്.