Vaccination Card | വാക്സിനേഷൻ കാർഡ്: നിങ്ങളുടെ കുട്ടിക്ക് നിർബന്ധമായും ഉണ്ടായിരിക്കേണ്ട ഒന്ന്

നവജാത ശിശുക്കളുടെ പ്രതിരോധശേഷി ജനന സമയത്തിന് ശേഷം കാലക്രമേണ പരുവപ്പെട്ട് വരുന്ന ഒന്നാണ്. നല്ല ശുചിത്വം, പോഷകാഹാരം, ശരിയായ സമയത്ത് നൽകുന്ന കുത്തിവെപ്പുകൾ എന്നിവയുടെ അഭാവം ഇൻഫെക്ഷനുകളോ രോഗങ്ങളോ കുട്ടികൾക്ക് ഉണ്ടാകാൻ ഇടയാക്കുന്നു. പോളിയോ, ടെറ്റനസ്, മീസിൽസ്, വില്ലൻ ചുമ, മെനിഞ്ചൈറ്റിസ് തുടങ്ങിയ മാരകമായ എന്നാൽ തടയാൻ കഴിയുന്ന രോഗങ്ങളിൽ നിന്ന് നിങ്ങളുടെ കുട്ടിയെ സംരക്ഷിക്കാൻ സമയബന്ധിതമായ പ്രതിരോധ കുത്തിവെപ്പുകൾ സഹായിക്കുന്നു. നിങ്ങളുടെ കുട്ടിയുടെ ശരീരത്തിന് ഈ രോഗങ്ങൾക്കെതിരെ ആന്‍റിബോഡികൾ നിർമ്മിക്കാൻ കഴിയുന്ന തരത്തിലുള്ള ആന്‍റിജനുകളിൽ നിന്നാണ് ഈ വാക്സിനുകൾ നിർമ്മിച്ചിരിക്കുന്നത്. തൽഫലമായി, ഇത് നിങ്ങളുടെ കുട്ടിയുടെ പ്രതിരോധശേഷി വർദ്ധിപ്പിക്കുകയും ജീവൻ അപകടത്തിലാക്കുന്ന രോഗങ്ങളിൽ നിന്ന് സംരക്ഷിക്കുകയും ചെയ്യുന്നു.

നിങ്ങളുടെ നവജാതശിശുവിന് കുത്തിവെപ്പ് നൽകുന്നത് വഴി ഇത്തരം രോഗങ്ങളിൽ നിന്നുള്ള സംരക്ഷണം മാത്രമല്ല ലഭിക്കുന്നത്, നിങ്ങളുടെ കുടുംബാംഗങ്ങൾക്കും സുഹൃത്തുക്കൾക്കും സംരക്ഷണം നൽകുകയും ചെയ്യുന്നു. ഇത് ഭാവി തലമുറകൾക്കും സംരക്ഷണം നൽകുന്നു. വാക്സിനേഷൻ എടുക്കുന്നതിലൂടെ മാരക രോഗങ്ങളെ ചെറുക്കുന്നതിനൊപ്പം അവ കാരണമുണ്ടാകുന്ന കഷ്ടതകൾ ഗണ്യമായി കുറയ്ക്കാനും ഒരുപരിധി വരെ ഇല്ലാതാക്കാനും കഴിയും. നൂറുകണക്കിന് വർഷങ്ങൾക്ക് മുമ്പുള്ള മാരക രോഗമായിരുന്ന വസൂരിയെക്കുറിച്ച് പഠിക്കുമ്പോൾ ഇത് വ്യക്തമായി കാണാം.

കുട്ടികൾക്ക് വാക്സിനേഷൻ നൽകുന്നതിനൊപ്പം അത് എപ്പോൾ നൽകുന്നു എന്നതും വളരെ പ്രധാനപ്പെട്ട കാര്യമാണ്. വാക്സിനേഷനുകൾക്ക് വിദഗ്ദ്ധർ നിഷ്ക്കർഷിക്കുന്ന സമയവും ചിട്ടകളുമുണ്ട്. ആ ഷെഡ്യൂൾ പ്രകാരം കുത്തിവെപ്പുകൾ പൂർത്തിയാക്കാൻ നിങ്ങളെ സഹായിക്കുന്ന ഒന്നാണ് Vaccination Card. നിങ്ങളുടെ കുട്ടിയുടെ വാക്സിനേഷൻ ഷെഡ്യൂളിന്‍റെ വിശദാംശങ്ങൾ സൂക്ഷിക്കാനും അടുത്ത വാക്സിൻ നൽകേണ്ട സമയം ആകുമ്പോൾ അത് നിങ്ങളെ അറിയിക്കാനും ഇത് സഹായകരമാണ്. സാധാരണയായി നിങ്ങളു ശിശുരോഗവിദഗ്ദ്ധരാണ് Vaccination Card നൽകുന്നത്, 18 വയസ്സ് വരെ എടുക്കണമെന്ന് നിഷ്കർഷിക്കുന്ന എല്ലാ പ്രധാന വാക്സിനുകളും ഇതിൽ രേഖപ്പെടുത്തിയിട്ടുണ്ടാകും.