380 ജീവനക്കാരെ പിരിച്ചുവിടുമെന്ന് സ്വി​ഗി; ജീവനക്കാർക്ക് സിഇഒയുടെ നീണ്ട കത്ത്

പിരിച്ചുവിട്ട ജീവനക്കാർക്കായി അവരുടെ ജോലി ചെയ്ത കാലാവധിയും ഗ്രേഡും അടിസ്ഥാനമാക്കിയുള്ള സെറ്റിൽമെന്റും സ്വി​ഗി പ്രഖ്യാപിച്ചിട്ടുണ്ട്. ”ജോലി നഷ്ട്ടപ്പെടുന്ന എല്ലാ ജീവനക്കാർക്കും കുറഞ്ഞത് 3 മാസത്തെ ശമ്പളം കിട്ടുമെന്ന് ഉറപ്പാക്കും. ഇതിൽ ഇൻസെന്റീവ് തുകയുടെ 100 ​​ശതമാനവും ഉൾപെടും. ബോണസ് ഉൾപ്പെടെയുള്ള മറ്റ് ആനുകൂല്യങ്ങൾ ലഭിക്കില്ല ” സ്വിഗ്ഗി സിഇഒ പറഞ്ഞു.

എല്ലാവർഷവും കമ്പനിയുടെ ഇക്വിറ്റി ഓഹരിയുടെ ഒരു ഭാഗം കിട്ടിയിരുന്നത് പൂർണമായും നിർത്തലാക്കി. 2023 മെയ് 31 വരെ ജീവനക്കാർക്കും നോമിനേറ്റഡ് കുടുംബാംഗങ്ങൾക്കും മെഡിക്കൽ ഇൻഷുറൻസ് പരിരക്ഷ തുടർന്നും നൽകും. പിരിച്ചുവിടപ്പെടുന്ന തൊഴിലാളികൾക്ക് സ്വി​ഗി അതിന്റെ ഔട്ട്‌പ്ലേസ്‌മെന്റ് സെൽ വഴി അടുത്ത മൂന്ന് മാസത്തേക്ക് കരിയർ ട്രാൻസിഷന് ആവശ്യമായ സഹായം നൽകുമെന്നും സിഇഒ പറഞ്ഞു.

ഇന്ന് നേരത്തെ എല്ലാവരും യോഗത്തിൽ എത്തിച്ചേർന്നതിൽ നന്ദി രേഖപെടുത്തിക്കൊള്ളട്ടെ. യോഗത്തിൽ ഞാൻ സൂചിപ്പിച്ചതുപോലെ, ഒരു പുനഃസംഘടനയുടെ ഭാഗമായി ഞങ്ങളുടെ ടീമിന്റെ വലുപ്പം കുറയ്ക്കുന്നതിനുള്ള വളരെ ബുദ്ധിമുട്ടുള്ള തീരുമാനമാണ് ഞങ്ങൾ നടപ്പിലാക്കുന്നത്. കഴിവുള്ള 380 ജീവനക്കാരാണ് നമ്മളോട് വിടപറയുന്നത്. ലഭ്യമായ എല്ലാ സാധ്യതകളും പരിശോധിച്ച ശേഷം എടുത്ത വളരെ ബുദ്ധിമുട്ടും വിഷമവുമുള്ള തീരുമാനമാണിത്, ഇതിലൂടെ കടന്നുപോകേണ്ടി വന്നതിൽ ഞാൻ നിങ്ങളോട് അങ്ങേയറ്റം ഖേദിക്കുന്നു.

ആഗോളതലത്തിൽ നിരവധി കമ്പനികൾ സമാന സാഹചര്യം നേരിടുകയാണ്. ഞങ്ങളുടെ ലക്ഷ്യങ്ങൾ നേടിയെടുക്കാൻ മൊത്തത്തിലുള്ള ചെലവുകൾ പുനഃപരിശോധിക്കേണ്ടതുണ്ട്. ഇൻഫ്രാസ്ട്രക്ചർ, ഓഫീസ്, മറ്റ് സൗകര്യങ്ങൾ മുതലായ മേഖലകളിലെ ചെലവുകൾ കുറയ്ക്കാൻ ഇതിനകം നടപടികൾ ആരംഭിച്ചിട്ടുണ്ട്. ജീവനക്കാരുടെ ആധിക്യം ഞങ്ങൾക്കുണ്ടായ ഒരു വീഴ്‌ചയാണ്. അക്കാര്യത്തിൽ കുറച്ചുകൂടി നന്നായി ആലോചിച്ച് തീരുമാനങ്ങൾ എടുക്കണമായിരുന്നു. ഞങ്ങൾ ഇനിയും മെച്ചപ്പെടുത്തേണ്ട ഒട്ടേറെ മേഖലകളുണ്ട്. കുറഞ്ഞ അം​ഗബലം ഉപയോ​ഗിച്ച് കൂടുതൽ കാര്യങ്ങൾ ചെയ്യുക എന്ന അടിസ്ഥാന കാര്യം പിന്തുടരുന്നതിൽ ഞങ്ങൾക്ക് വീഴ്ചയുണ്ടായി. ഇത് വീണ്ടും ഉണ്ടാകാതിരിക്കാൻ ഒരു പുനക്രമീകരണം നടപ്പാക്കാൻ ഞങ്ങൾ നിർബന്ധിതരായിരിക്കുകയാണ്.