പതിനായിരങ്ങൾ ഉപേക്ഷിച്ച് 5000 രൂപ ശമ്പളക്കാരനായി; തൊട്ടതെല്ലാം വിസ്മയമാക്കി; സ്വപ്നതുല്യമായ സ്റ്റാർട്ട് അപ്പ്

വന്നെത്തിയത് എറണാകുളം കളമശേരിയിലെ സ്റ്റാർട്ട് അപ്പ് വില്ലേജിൽ. കേരളത്തിൽ സ്റ്റാർട്ട് അപ്പ് എന്നു പറഞ്ഞു കേട്ടു തുടങ്ങിയിട്ടേ ഉള്ളൂ. സ്റ്റാർട്ട് അപ്പ് വില്ലേജിൽ വേറെ കമ്പനികളൊന്നും അങ്ങനെ ഇടമുറപ്പിച്ചിട്ടില്ല. ഒറ്റയ്ക്കായിരുന്നില്ല. ഇൻഫോസിസ്‍ വിടാനൊരുങ്ങിയപ്പോഴേ ഒപ്പം പഠിച്ച ജോഫിനെയും നിതിനെയും അനൂപിനെയും വിളിച്ചു. അവരും അവരുടെ ജോലികൾ വിട്ട് അർജുന്റെ കൂടെയിറങ്ങിച്ചെന്നു. അങ്ങനെ 2011-ൽ പ്രൊഫൗണ്ടിസ് ലാബ്സ് എന്ന കമ്പനി പിറവികൊണ്ടു. ആസ്ഥാനം കളമശേരി സ്റ്റാർട്ട് അപ്പ് വില്ലേജ്. അവിടെ തുടക്കം കുറിച്ച ആദ്യകമ്പനിയും ഇതുതന്നെ.

മോഹിപ്പിക്കുന്ന ശമ്പളമുള്ള ജോലി വിട്ടിറങ്ങിയവരായിരുന്നു അവർ നാലു പേരും. അർജുൻ ലീഡർ. സ്റ്റാർട്ടിംഗ് ട്രബിളൊന്നും ഉണ്ടായില്ലെങ്കിലും സ്റ്റാർട്ട് അപ്പാകാൻ നല്ല പ്രയാസമായി. ആദ്യം തയ്യാറാക്കിയ പ്രൊഡക്ടുകളൊന്നും രക്ഷപ്പെട്ടില്ല. പുതിയ പുതിയ ആശയങ്ങളുമായി അർജുനും ടീമും മുന്നോട്ടു പോയി. അതിനിടയിൽ അവിചാരിതമായി ഉരുത്തിരിഞ്ഞ ആശയമാണ് പ്രൊഫൗണ്ടിസിന്റെ ജാതകം മാറ്റിയെഴുതിയത്. ക്ലൈന്റ് മീറ്റിംഗുകൾക്ക് തയ്യാറെടുക്കാൻ ഏറെ സമയം മുന്നൊരുക്കത്തിനായി വേണ്ടിവന്നിരുന്നു. കാണാൻ പോകുന്നവരെക്കുറിച്ചുള്ള വിവരശേഖരണമായിരുന്നു പ്രധാനം. ഇതെല്ലാം കൂടി ഒന്നിച്ചു കിട്ടിയിരുന്നെങ്കിൽ എന്ന ചിന്തയാണ് അർജുന്റെയും പ്രൊഫൗണ്ടിസിന്റെയും വഴി വിജയത്തിലേക്കു തിരിച്ചുവിട്ട വൈബ്സ് എന്ന ആപ്ലിക്കേഷന്റെ പിറവിക്കു കാരണമായത്.

വൈബ്സിലൂടെ സ്റ്റാർട്ട് അപ്പ് വിജയഭൂപടത്തിൽ ഇടം പിടിച്ച പ്രൊഫൗണ്ടിസ് മുന്നോട്ട് കുതിക്കുകയായിരുന്നു. 2011ൽ തുടങ്ങിയ പ്രൊഫൗണ്ടിസിനെ 2016ലാണ് അമേരിക്കൻ കമ്പനിയായ ഫുൾ കോൺടാക്ട് ഏറ്റെടുത്തത്.  കേരളത്തിലെ തന്നെ അക്കാലത്തെ ഏറ്റവും മൂല്യമുള്ള ഏറ്റെടുക്കലായിരുന്നു അത്. പിന്നാലെ അർജുനും ടീമും അമേരിക്കയിലേക്കു പറന്നു. ഇരുന്നൂറോളം ജീവനക്കാരുമായാണ് ഫുൾ കോൺടാക്ടിൽ പ്രൊഫൗണ്ടിസ് ലയിച്ചത്.

അമേരിക്കയിലെ ഡാറ്റാ കമ്പനികളുമായുള്ള ബന്ധവും നിരന്തര ആശയവിനിമയവും അർജുനെ പുതിയ ചിന്തകളിലേക്കു നയിച്ചു. ഏതാണ്ട് ഒന്നര വർഷത്തിലേറെ മാത്രമായിരുന്നു ഫുൾകോണ്ടാക്ടിലെ ജീവിതം. 2018 ആദ്യം അവിടെ നിന്നുമിറങ്ങി അർജുൻ. ഇതിന് അർജുൻ തന്നെ കണ്ടെത്തുന്ന വിശദീകരണം ഇങ്ങനെ: 'ഒരിക്കൽ സ്റ്റാർട്ട് അപ്പ് തുടങ്ങി വിജയിപ്പിക്കുന്നവർക്ക് എപ്പോഴും ഒരു പ്രോബ്ലം സോൾവിംഗ് മൈൻഡ് ഉണ്ടാകും.'

2018 പകുതിയായപ്പോഴേക്കും അർജുനും ചങ്ങാതി ചെന്നൈക്കാരൻ പ്രസന്ന വെങ്കടേഷും കൈകോർത്തു. ഇൻസെന്റ് ഡോട്ട് എഐ (insent.ai) എന്ന കമ്പനി അങ്ങനെ രൂപം കൊള്ളുകയായിരുന്നു. ഇരുവരും ഏറെക്കാലമായി പരിചിതർ.

ഇ-മെയിലിനു പകരമായി ബിസിനസ് സൊല്യൂഷനുകൾക്കു വേണ്ടിയുള്ള ചാറ്റ് പ്ലാറ്റ് ഫോം വികസിപ്പിച്ചു. സാധാരണ ചാറ്റ് ആപ്ലിക്കേഷനുകളിൽ വ്യത്യസ്തമായി ബിസിനസ് രംഗത്തുള്ളവർക്ക് സ്വകാര്യതയും ഗൗരവവും ഉറപ്പാക്കുന്ന രീതികളായിരുന്നു ഇതിൽ. ഇന്റന്റ്, കൺസെന്റ് എന്നീ വാക്കുകൾ ചേർത്താണ് കമ്പനിക്ക് ഇൻസെന്റ് എന്ന പേരു നൽകിയത്. പേരു വന്ന വഴി പോലെ തന്നെ, ചാറ്റ് ചെയ്യുന്നവരുടെ കൺസെന്റ് ഉണ്ടെങ്കിൽ മാത്രം മുന്നോട്ട് സംഭാഷണവുമായി പോകാവുന്നതാണ് ഇവർ വികസിപ്പിച്ച സംവിധാനം.

കമ്പനി തുടങ്ങിയ 2020ൽതന്നെ ആദ്യത്തെ കസ്റ്റമറെയും കിട്ടി. ചാറ്റ് പ്ലാറ്റ്ഫോം, ചാറ്റ് ബോട്ട് തുടങ്ങി എല്ലാ സാങ്കേതിക സംവിധാനവും ഒരുക്കിയതോടെ കൂടുതൽ കൂടുതൽ പേർ ഇൻസെന്റിന്റെ ഉപഭോക്താക്കളായി. അങ്ങനെ അർജുന്റെ രണ്ടാമത്തെ സംരംഭവും വിജയത്തിന്റെ പടവുകൾ ചവിട്ടി. ഇൻസെന്റ് വിജയവഴിയിലേക്കു മാറിയതോടെ നിക്ഷേപകരും കൂടി. ഇൻസെന്റ് അടുത്ത ഘട്ടത്തിലേക്കു കടക്കാനൊരുങ്ങുന്നതിനിടെയാണ് വലിയൊരു ട്വിസ്റ്റ് ഉണ്ടാകുന്നത്.

അടുത്തകാലത്തുണ്ടായ മാറ്റങ്ങളെക്കുറിച്ചു കുറച്ചുനാൾ മുമ്പ് അർജുൻ അയച്ച ഒരു ഇമെയിലാണ് വഴിത്തിരിവായത്. ഇരുവരും തമ്മിലുള്ള സംസാരം പെട്ടെന്നാണ് വഴിമാറിയത്. അർജുനൊന്നിച്ച് പ്രവർത്തിക്കണമെന്ന ഹെൻ‌റിയുടെ വാക്ക്. ഇൻസെന്റിന്റെ ഏറ്റെടുക്കലിനെക്കുറിച്ചായി ചർച്ച പിന്നീട്. സ്വന്തമായി വികസിപ്പിച്ച കമ്പനിക്ക് അർജുൻ ഒരു വില കണ്ടിരുന്നു. ആർക്കും കേട്ടാൽ ഭീമമെന്നു തോന്നുന്ന വില. ചർച്ച പുരോഗമിച്ചപ്പോൾ അർജുൻ ഈ തുക തുറന്നു പറഞ്ഞു.

പിന്നെയുണ്ടായതെല്ലാം സ്വപ്നത്തിലെന്ന പോലെ. ഒരു കൂടിക്കാഴ്ച. അർജുന്റെ ഉപാധികൾ കേട്ട് കമ്പനിയിലെ ഉന്നതരുമായി സംസാരിക്കാൻ പോയ ഹെൻ‌‌റി തിരികെ വന്ന് കൈ കൊടുത്തു സമ്മതിച്ചു. അർജുൻ കൽപിച്ച വിലയിൽനിന്ന് ഒരു ഡോളർ പോലും കുറയാത്ത തുക. അറുനൂറു ദശലക്ഷം ഡോളർ വരുമാനമുള്ള സൂം ഇൻഫോ അർജുന്റെ രണ്ടാം കമ്പനിയായ ഇന്സെന്റിനെ ഏറ്റെടുത്തു. നിക്ഷേപിച്ച തുകയെത്രയെന്ന് ഇനിയും വെളിപ്പെടുത്തിയിട്ടില്ല.

ഇരുപത്തിരണ്ടാം വയസിൽ അദ്ഭുതം കാട്ടിയ അർജുൻ പത്തുവർഷം കഴിഞ്ഞ് മുപ്പത്തിരണ്ടാം വയസിൽ വിസ്മയമാണ് കാട്ടിയത്. ഇരു കമ്പനികളും ഒന്നായതോടെ സൂം ഇൻഫോയുടെ സീനിയർ വൈസ് പ്രസിഡന്റ് പദവിയിലാണ് അർജുൻ ഇപ്പോൾ. പക്ഷേ, ഒന്നുറപ്പിച്ചു പറയുന്നുണ്ട് അർജുൻ. ഇതെന്റെ അവസാന കമ്പനിയില്ല. ആ വാക്കുകളിൽ തന്നെ വ്യക്തമാണ്, സ്റ്റാർട്ട് അപ്പുകളെ ഹൃദയത്തിൽ കൊണ്ടു നടക്കുന്ന യുവ മനസ്.

കമ്പനികളോ ഏറ്റെടുക്കലോ നിക്ഷേപങ്ങളോ അല്ല, അർജുന്റെ മനസിൽ എപ്പോഴും സ്റ്റാർട്ട് അപ്പുകൾ തന്നെയാണ്. ലോകത്തിന്റെ വിവിധ ഭാഗങ്ങളിൽ നിന്നായി അത്രയധികം സംരംഭക മനസുകളാണ് അർജുനെ തേടിയെത്തുന്നത്. ഉപദേശങ്ങളും മാർഗനിർദേശങ്ങളും കൊടുത്ത് അവർക്കൊപ്പം അർജുനുമുണ്ട്. ആഴ്ചയിൽ ഒരു മണിക്കൂർ ഒരു പുതിയ സ്റ്റാർട്ട് അപ്പിനായി മാറ്റിവയ്ക്കും. അവർക്കുള്ള വഴികാട്ടിയായി ആ സമയം മാറും.

നിർമിത ബുദ്ധി നമ്മുടെ നിത്യജീവിതത്തെ നയിക്കുന്ന നാളുകളാണ്. നിർമിത ബുദ്ധി പുതിയ പടവുകൾ കയറുമ്പോൾ ഏറ്റവും ആവശ്യം ഡാറ്റയാണ്. ഡാറ്റയിൽ ചുവടൂന്നിയാണ് മനുഷ്യനോട് മത്സരിക്കുന്ന നിർമിത ബുദ്ധിയുടെ വളർച്ച. റിഗുകളിൽ പോയി വരുന്ന കപ്പലുകൾ കടലിൽ എത്ര മുങ്ങുന്നുണ്ട് എന്നു നോക്കി ഓരോ രാജ്യത്തിന്റെയും എണ്ണ ഉപയോഗം കണ്ടെത്തുന്നതും, ടെസ്‌ല കാറുകളിൽ പുതിയ ഫീച്ചറുകൾ വരുന്നതുമൊക്കെ ഈ ഡാറ്റയെ അടിസ്ഥാനമാക്കി മാത്രമായിരിക്കും. അതായത് വരുന്ന കാലം ഡാറ്റയും നിർമിത ബുദ്ധിയും വാഴുമെന്ന് തന്നെയാണ് അർജുൻ പറയുന്നത്. അപ്പോഴും, മനുഷ്യനെ നിർമിത ബുദ്ധി കീഴടക്കുമോ എന്ന ചോദ്യത്തിന് ഇല്ലെന്ന മറുപടിയും.

ഡാറ്റ ലോകം കീഴടക്കുമ്പോൾ മലയാളിക്ക് അഭിമാനമാണ് അർജുൻ. മുപ്പത്തിരണ്ടു വയസിനുള്ളിൽ ഡാറ്റയുടെ ലോകം കീഴടക്കിയ ചെറുപ്പക്കാരൻ. ഉള്ളിൽ ചിതറുന്നത് പുതിയ ആശയങ്ങളുടെയും സംരംഭങ്ങളുടെയും തീപ്പൊരി. തിരുവല്ല സ്വദേശി രാജശേഖരൻ പിള്ളയുടെയും അംബികാദേവിയുടെയും മകനാണ് അർജുൻ. ഭാര്യ ഡോ. അഖില.