OPINION | കൊറോണക്കാലത്തെ ഓൺലൈൻ അധ്യയനം; ഈ പ്രശ്നങ്ങൾ പരിഹരിക്കപ്പെടണം

എല്ലാ വിദ്യാർഥികളുടെയും വീടുകളിൽ ടിവിയും കേബിൾ കണക്ഷനും ഉണ്ടോയെന്നതു തന്നെയാണ് വിദ്യാഭ്യാസ വകുപ്പിന് മുന്നിലെ പ്രധാന വെല്ലുവിളി. ടി.വി ഉണ്ടെങ്കിൽ തന്നെ കേബിൾ കണക്ഷനും വൈദ്യുതിയും ക്ലാസ് നടക്കുന്ന സമയത്ത് ഉണ്ടാകുമെന്നതിലും ഒരു ഉറപ്പുമില്ല.

ഹൈപ്പർ ആക്ടിവിറ്റി, ലേണിംഗ് ഡിസെബിലിറ്റി, അറ്റെൻഷൻ ഡെഫിസിറ്റ്, ഓട്ടിസം, കാഴ്ച ശക്തി കുറവ്, ബുദ്ധി വൈകല്യം, സെറിബ്രൽ പാൽസി എന്നീ വിഭാഗങ്ങളിൽ ഉൾപ്പെടുന്ന കുട്ടികളെ എങ്ങനെയാണ് ഓൺലൈൻ ബോധനത്തിൽ ഉൾക്കൊള്ളിക്കാൻ ഉദ്ദേശിക്കുന്നതെന്ന് സർക്കാർ ഇതുവരെ വ്യക്തമാക്കിയിട്ടില്ല.

കുട്ടികളുടെ സംശയ നിവാരണത്തിന്അധ്യാപകർ ശ്രദ്ധിക്കണമെന്നാണ് നിർദേശം. ഇതിനായി വാട്സാപ്പ് അല്ലെങ്കിൽ ഫോൺ ഉപയോഗിക്കണം. ഇത് എത്രത്തോളം പ്രായോഗികമാണ്?. ഒരോ കുട്ടികളുടെ സംശയനിവാരണത്തിനു വേണ്ടി ഒരു അദ്ധ്യാപകൻ ഇത്തരത്തിൽ എത്ര മണിക്കൂർ വിനിയോഗിക്കേണ്ടിവരും?. അതുകൊണ്ടു തന്നെ ഇതിനായി സമയം നിശ്ചയിക്കേണ്ടതും അനിവാര്യമാണ്. ഇതു നിശ്ചയിക്കുമ്പോൾ അധ്യപകർക്കും പ്രൊഫഷണൽ ലൈഫിനൊപ്പം പേഴ്സണൽ ലൈഫും ഉണ്ടെന്നത് പരിഗണിക്കേണ്ടതുണ്ട്.

CBSE ICSE സിലബസുകളിലുള്ള കുട്ടികൾക്ക് ഇതിനോടകം തന്നെ ക്ലാസ്  തുടങ്ങിക്കഴിഞ്ഞു. പല സ്കൂളുകളിലും രാവിലെ 8 മുതൽ 2.45 വരെയാണ് ക്ലാസ്. പ്രഭാത ഭക്ഷണത്തിന് ഒരു മണിക്കൂർ, ഉച്ചയൂണിന്  ഒരു മണിക്കൂർ, ഇതിനിടയിൽ തുടർച്ചയായ മൂന്നു മണിക്കൂർ ക്ലാസ്. ഇങ്ങനെയാണ് ക്രമീകരണം. ശാസ്ത്രീയമാണോ ഈ സമയ ക്രമീകരണം. ഈ സമയം ഇത് ഉണ്ടാക്കാൻ പോകുന്ന ശാരീരിക മാനസീക പ്രശ്നങ്ങൾ എന്തൊക്കെയാണ്?

വിദ്യാലയം എന്നത് അക്കാദമിക് കാര്യങ്ങൾക്ക് വേണ്ടുയള്ള സ്ഥലം മാത്രമല്ല, കുട്ടികളുടെ രണ്ടാം ഗൃഹം കൂടിയാണ്.  ഇനിയുള്ള കാലത്ത് ഈ സങ്കൽപം എങ്ങനെ നടപ്പാകുമെന്നതും ഒരു പ്രധാന ചോദ്യമാണ്. സാമൂഹ്യമായി ഇടപഴകാൻ പഠിക്കുന്നതും വ്യക്തിത്വ വികാസം നേടുന്നതുമൊക്കെ വിദ്യാലയങ്ങളിൽ നിന്നാണ്. കുട്ടികളുടെ ശാരീരികമായ വ്യായാമത്തിനു അധ്യയനത്തിൽ വളരെ പ്രാധാന്യമുണ്ട്. അതിനുള്ള  നടപടികളും ഓൺലൈൻ അധ്യയനത്തിൽ ഉറപ്പാക്കാൻ വിദ്യാഭ്യാസ വകുപ്പും രക്ഷിതാക്കളും ശ്രദ്ധിക്കണം.

ഇന്നത്തെ കാലത്ത് സൈബർ  നിയമം സംബന്ധിച്ച് അധ്യാപകർക്കും കുട്ടികൾക്കും രക്ഷകർത്താക്കൾക്കും ധാരണയുണ്ടാകേണ്ടതും അനിവാര്യമാണ്.  System security യെ കുറിച്ചും അറിയേണ്ടതുണ്ട്. കുട്ടികൾ class കേൾക്കുന്നുണ്ടോ എന്നുള്ളത് വിലയിരുത്താനുള്ള മറ്റു മാർഗങ്ങളില്ലെന്നും ഓർക്കണം.

സ്കൂളുകളിൽ പോകാനാകാതെ വരുന്നതോടെ കുട്ടികൾ, അധ്യാപകർ,  രക്ഷിതാക്കൾ എന്നിവരിലുണ്ടാകുന്ന മാനസിക പിരിമുറുക്കങ്ങൾ മനസിലാക്കണ്ടതും അതിനായി മാനസിക വിദഗ്ധരുടെ സഹായം തേടേണ്ടതും അനിവാര്യമാണ്. ഉന്മേഷമില്ലായ്മ,  അമിതമായ ദേഷ്യം, പിരിമുറുക്കം, ഉത്കണ്ഠ എന്നിവ ചില മാനസിക പ്രശ്നങ്ങളും ഉറക്കമില്ലായ്മ , തലവേദന , കഴുത്ത് വേദന എന്നിവ ഏതാനും ചില ശാരീരി പ്രശ്നങ്ങളുമായിരിക്കും. ഇരിക്കുന്ന രീതി, സ്ക്രീൻ വയ്ക്കുന്ന ഉയരം, സ്ക്രീൻ ബ്രൈറ്റ്നസ്, സ്പീക്കർ വോള്യം എന്നിവയൊക്കെ ശ്രദ്ധിക്കേണ്ട ഘടകങ്ങളാണ്.