Coronavirus Community Spread | കോവിഡ് സമൂഹ വ്യാപനം: ഒളിച്ചുകളിക്കുന്നോ സർക്കാർ ?

കോവിഡ് രോഗ വ്യാപനത്തിന്റെ വ്യാപ്തി അറിയാൻ ഐസിഎംആർ നിർദ്ദേശിച്ച  പരിശോധനയാണ് സെറോ സർവെ. എലീസ കിറ്റ് ഉപയോഗിച്ചാണ് പരിശോധന. റാപ്പിഡ് ടെസ്റ്റ് കിറ്റ് ഉപയോഗിച്ചുള്ള നിലവിലെ പരിശോധന രോഗബാധ സ്ഥിരീകരിക്കാൻ മാത്രമേ സഹായിക്കൂ. എന്നാൽ എൻസൈമുകളും രക്തത്തിലെ ആന്റി ബോഡികളും കണക്കാക്കി എലീസ കിറ്റ് ഉപയോഗിച്ചുള്ള പരിശോധനയിൽ  മുമ്പ് അണുബാധയുണ്ടായിട്ടുണ്ടോയെന്ന് പോലും  കണ്ടെത്താനാകും.  രക്തത്തിൽ  ഇമ്മ്യൂണോഗ്ളോബുലിൻ (ഐജിജി)  ആന്റിബോഡിയുണ്ടോയെന്നാണ് എലീസ ടെസ്റ്റിലൂടെ പരിശോധിക്കുന്നത്. രോഗം ഭേദമായാലും ഒരു മാസത്തോളം ഐജിജി ആന്റിബോഡി രക്തത്തിലുണ്ടാകും.

സംസ്ഥാന ആരോഗ്യവകുപ്പുകളുടേയും  ദേശീയ രോഗ പ്രതിരോധ സെന്ററിന്റെയും ലോകാരോഗ്യ സംഘടനയുടെയും സഹായത്തോടെയാണ് ഐസിഎംആർ രാജ്യത്ത് സെറോ സർവെ നടത്തിയത്. ഇരുപത്തിയൊന്ന് സംസ്ഥാനങ്ങളിലെ എഴുപത് ജില്ലകളിൽ നിന്നായി ഇരുപത്തി നാലായിരം പേരുടെ രക്ത സാമ്പിളുകൾ ശേഖരിച്ചു. ഇതിന് പുറമെ കോവിഡ് ഹോട്ട്സ്പോട്ടുകളായ മുംബൈ, അഹമ്മദാബാദ്, പുനെ, ഡൽഹി, കൊൽക്കത്ത, ഇൻഡോർ, താനെ, ജയ്പൂർ, ചെന്നൈ, സൂറത്ത് തുടങ്ങിയ പത്തുനഗരങ്ങളിൽ നിന്ന് അയ്യായിരം പേരുടെ രക്ത സാമ്പിളുകളും ശേഖരിച്ച് പരിശോധിച്ചു.

കഴിഞ്ഞ മാസം പൂർത്തിയായ  സർവേയുടെ ഫലം എന്തുകൊണ്ടാണ്  പ്രധാനമന്ത്രിയുടെ ഓഫീസ് തന്നെ മറച്ചു വയ്ക്കുന്നത്? രാജ്യം അതിവേഗം കോവിഡ് രോഗത്തിന്റെ പിടിയിൽ അമരുമ്പോഴും എന്തുകൊണ്ടാണ് ഇക്കാര്യത്തിൽ കേന്ദ്രസർക്കാർ ഒളിച്ചുകളിക്കുന്നത്?  വിദഗ്‌ധരുടെ അഭിപ്രായത്തിൽ അതിന് ഒരു മറുപടിയേയുള്ളൂ. സർവെ ഫലം പുറത്തുവന്നാൽ രാജ്യത്ത് സമൂഹ വ്യാപനമുണ്ടെന്ന് സമ്മതിക്കേണ്ടി വരും. കേന്ദ്രസർക്കാർ ഇതുവരെ പറഞ്ഞത് തിരുത്തി പറയേണ്ടി വരും. അടച്ചിടൽ കൊണ്ട്  പ്രതീക്ഷിച്ച ഗുണമുണ്ടായില്ലെന്ന് സമ്മതിക്കേണ്ടി വരും. പാത്രത്തിൽ മുട്ടിയതും  വിളക്ക് കത്തിച്ചതും  വെറുതെയായിരുന്നു എന്ന് പറയേണ്ടി വരും. പകരം  കൊൽക്കത്തയിൽനിന്നും  ജമ്മുകശ്‌മീരിൽ  നിന്നും ശേഖരിച്ച രക്ത സാമ്പിളുകളുടെ പരിശോധന പൂർത്തിയായിട്ടില്ലെന്ന് പറഞ്ഞ് സർവെ ഫലം വൈകിപ്പിക്കുകയാണ്.

മുംബൈയ്ക്കും ചെന്നൈയ്ക്കും പിന്നാലെ രാജ്യതലസ്ഥാനവും അതിവേഗം കോവിഡ് രോഗികളുടെ കേന്ദ്രമാവുകയാണ്.  ഒന്നിച്ച് നേരിടുന്നതിന് പകരം മുംബൈയിലും ഡൽഹിയിലും  കേന്ദ്രവും സംസ്ഥാനവും രണ്ട് തട്ടിലാണ്. ഡൽഹിയിൽ  മുഖ്യമന്ത്രിയും ഗവർണറും കച്ചമുറുക്കി പരസ്യമായി തന്നെ പോരടിക്കുകയാണ്.  അരവിന്ദ് കെജ്രിവാൾ മുഖ്യമന്ത്രിയായി എത്തിയത് മുതൽ ഈ ലഫ്റ്റന്റ് ഗവർണർ ഇടഞ്ഞ് തന്നെയാണ്.  ഇടയ്ക്കൊന്ന് അയഞ്ഞെങ്കിലും  പോരാട്ടം കോവിഡ് കാലത്ത് വീണ്ടും മുറുകുകയാണ്.