ICC Test Ranking: മൂന്നര വർഷത്തിനുശേഷം ഇന്ത്യയ്ക്ക് ഒന്നാം സ്ഥാനം നഷ്ടമായി; ഓസീസ് ഒന്നാമത്

ടെസ്റ്റ് റാങ്കിങ്ങിൽ ഇന്ത്യയെ മറികടന്ന ഓസ്‌ട്രേലിയ 116 റേറ്റിങ്ങ് പോയിന്‍റുമായാണ് ഒന്നാമതെത്തിയത്. ന്യൂസിലൻഡ് (115) രണ്ടാം സ്ഥാനത്ത് എത്തിയപ്പോൾ മൂന്നരവർഷമായി ഒന്നമതായിരുന്ന ഇന്ത്യ 114 പോയിന്റുമായിഇപ്പോൾ മൂന്നാം സ്ഥാനത്താണ്. ഇംഗ്ലണ്ടാണ് നാലാമത്. ശ്രീലങ്ക അഞ്ചാം സ്ഥാനത്താണ്.

2003ൽ ടെസ്റ്റ് റാങ്കിങ് ആരംഭിച്ചെങ്കിലും വർഷങ്ങളോളം ഓസ്ട്രേലിയ, ദക്ഷിണാഫ്രിക്ക ടീമുകളായിരുന്നു ആദ്യ രണ്ടു സ്ഥാനം പങ്കിട്ടിരുന്നത്. 2016ലാണ് ഇന്ത്യ ആദ്യമായി ഒന്നാമതെത്തിയത്. മൂന്നരവർഷത്തോളം ഒന്നാം സ്ഥാനത്ത് തുടരാനും ടീം ഇന്ത്യയ്ക്ക് സാധിച്ചു.

2016-17 ൽ ഇന്ത്യ 12 ടെസ്റ്റുകളിൽ വിജയിക്കുകയും ഒരു ടെസ്റ്റ് തോൽക്കുകയും ചെയ്തതോടെയാണ് ഒന്നാം സ്ഥാനം ഇന്ത്യയെ തേടിയെത്തിയത്. ഇക്കഴിഞ്ഞ സീസണിൽ അഞ്ച് ടെസ്റ്റ് പരമ്പരകളിൽ ജയിച്ചതോടെയാണ് ഓസ്ട്രേലിയ ഒന്നാമതെത്തിയത്. ഇതേ കാലയളവിൽ ഓസ്‌ട്രേലിയ ദക്ഷിണാഫ്രിക്കയോടും ഇന്ത്യയോടും മാത്രമാണ് തോറ്റത്.

അതേസമയം ടെസ്റ്റ് റാങ്കിങ്ങിൽ എട്ട് റേറ്റിങ് പോയിന്റുകൾ ഇടിഞ്ഞതോടെ ദക്ഷിണാഫ്രിക്ക ആറാം സ്ഥാനത്തായി. അവരുടെ ചരിത്രത്തിലെ ഏറ്റവും മോശം റാങ്കിങ്ങാണിത്. 2019 ഫെബ്രുവരി മുതൽ ശ്രീലങ്ക, ഇന്ത്യ, ഇംഗ്ലണ്ട് എന്നിവർക്കെതിരേ കളിച്ച ഒമ്പത് ടെസ്റ്റുകളിൽ എട്ടും അവർ തോറ്റു.

അതേസമയം ഐസിസി വേൾഡ് ടെസ്റ്റ് ചാമ്പ്യൻഷിപ്പിൽ ഇന്ത്യ ഇപ്പോഴും മുന്നിലാണ്, മികച്ച ഒമ്പത് ടെസ്റ്റ് ടീമുകൾ വീതം ആറ് പരമ്പരകൾ അടങ്ങുന്നതാണ് ലീഗ്.

ഐസിസി ഏകദിന ടീം റാങ്കിംഗിൽ ലോക ചാമ്പ്യൻമാരായ ഇംഗ്ലണ്ട് (127) ആണ് ഒന്നാമത്. 119 പോയിന്‍റോടെ ഇന്ത്യ രണ്ടാമതും 116 പോയിന്‍റുമായി ന്യൂസിലാൻഡ് മൂന്നാം സ്ഥാനത്തുമാണ്.

കഴിഞ്ഞ മൂന്ന് വർഷത്തിനിടയിൽ 84 രാജ്യങ്ങളുടെ പട്ടികയിൽ അഫ്ഗാനിസ്ഥാൻ ഏഴാം സ്ഥാനത്ത് നിന്ന് പത്താം സ്ഥാനത്തേക്ക് പിന്തള്ളപ്പെട്ടു. ബൾഗേറിയയാണ് ഏറ്റവും കൂടുതൽ നേട്ടമുണ്ടാക്കിയത്. 12 മാസം മുമ്പ് ആഗോള ടി 20 ഐ റാങ്കിംഗ് ആരംഭിച്ചപ്പോൾ 80 ടീമുകളായിരുന്നു റാങ്കിങ് പട്ടികയിൽ ഉണ്ടായിരുന്നത്. അതിനുശേഷം ഏഴ് ടീമുകൾ പട്ടികയിൽ ചേർന്നു (ബെർമുഡ, കേമാൻ ദ്വീപുകൾ, ഇറ്റലി, നോർവേ, പോർച്ചുഗൽ, റൊമാനിയ, തുർക്കി). പിന്നീട് മൂന്ന് രാജ്യങ്ങൾക്ക് റാങ്കിംഗ് പട്ടികയിൽ ഇടം നഷ്ടപ്പെട്ടു.