ചാമ്പ്യൻസ് ലീഗ് ക്വാർട്ടർ പോരാട്ടങ്ങൾക്ക് ഇന്ന് തുടക്കം; റയൽ മാഡ്രിഡ് - ലിവർപൂൾ, മാഞ്ചസ്റ്റർ സിറ്റി - ഡോർട്‌മുണ്ട്

ഇംഗ്ലീഷ് പ്രീമിയർ ലീഗ് ചാമ്പ്യന്മാരായ ലിവർപൂൾ ഇന്ന് മാഡ്രിഡിൽ വെച്ച് ലാലിഗ ചാമ്പ്യന്മാരായ റയൽ മാഡ്രിഡിനെ നേരിടും. ചാമ്പ്യൻസ് ലീഗ് ക്വാർട്ടറിന്റെ ആദ്യ പാദത്തിൽ ഇരു ടീമുകളും നേർക്കുനേർ വരുമ്പോൾ ആവേശകരമായ പോരാട്ടം തന്നെ ആണ് എല്ലാവരും പ്രതീക്ഷിക്കുന്നത്. അവസാനമായി ഇരു ടീമുകളും നേർക്കുനേർ വന്നത് മൂന്ന് വർഷം മുമ്പ് ഒരു ചാമ്പ്യൻസ് ലീഗ് ഫൈനലിൽ ആയിരുന്നു. അന്ന് റയൽ മാഡ്രിഡാണ് വിജയവും കിരീടവും സ്വന്തമാക്കിയത്. അന്നത്തെ മത്സരത്തിൽ സലായെ പരുക്കേൽപ്പിച്ച റാമോസ് ഇന്ന് റയൽ മാഡ്രിഡ് നിരയിൽ കളിക്കാൻ ഇറങ്ങില്ല. റാമോസ് മാത്രമല്ല പരുക്ക് കാരണം ഹസാഡ്, കാർവഹാൽ എന്നിവരും റയൽ നിരയിൽ ഉണ്ടാവില്ല.

Also Read- ലാലിഗയിൽ ഇഞ്ചോടിഞ്ച് പോരാട്ടം; അവസാന നിമിഷം ഡെംബലെ ഗോളിൽ ബാഴ്സ

ലിവർപൂൾ നിരയിൽ ദീർഘകാല പരിക്കുകൾ ആണ് പ്രശ്നമായി ഉള്ളത്. എങ്കിലും ദിയെഗോ യോട്ടയുടെ തിരിച്ചുവരവ് ലിവർപൂളിനെ ശക്തരാക്കിയിട്ടുണ്ട്. ആഴ്സണലിനെതിരെ അവസാന മത്സരത്തിൽ നേടിയ വിജയവും ലിവർപൂളിന് പ്രതീക്ഷ നൽകുന്നു.

മാഡ്രിഡിൽ ഇന്ന് പന്തുരുളുമ്പോൾ ജയത്തിൽ കുറഞ്ഞതൊന്നും ഇരു ടീമുകളും ആഗ്രഹിക്കുന്നുണ്ടാകില്ല. പരിക്ക് അലട്ടുന്നുണ്ടെങ്കിലും ഒരൽപം മുൻതൂക്കം റയലിന് തന്നെയാണ്, ലാ ലിഗയിൽ അവർ തകർപ്പൻ ഫോമിലാണ് കളിക്കുന്നത്. സ്റ്റാർ സ്ട്രൈക്കർ കരീം ബെൻസിമയുടെ ഫോമിനെ ആശ്രയിച്ചിരിക്കും ഇന്ന് റയലിൻ്റെ പ്രകടനം. താരം കഴിഞ്ഞ കുറേ മത്സരങ്ങളിലായി റയലിൻ്റെ സ്ഥിരം ഗോൾ വേട്ടക്കാരനാണ്. മറുവശത്ത്, ഹോം ഗ്രൗണ്ടിൽ അല്ല ആദ്യപാദം എന്നുള്ളത് ലിവർപൂളിന് ചെറിയ തോതിൽ ഒരു ആത്മവിശ്വാസം നൽകിയേക്കും. കാരണം ലിവർപൂളിന് ഈയിടെയായി അവരുടെ ഹോം ഗ്രൗണ്ടിൽ നടക്കുന്ന മത്സരങ്ങളിൽ എല്ലാം തോൽവി ആണ് സംഭവിക്കുന്നത്. ഇവിടെ റയലിൻ്റെ മൈതാനത്ത് ഗോൾ നേടാനായാൽ അത് രണ്ടാം പാദത്തിൽ അവർക്ക് എവെ ഗോളിൻ്റെ പിൻബലം നൽകും. ഇരു ടീമുകളും തങ്ങളുടെ ശെരിക്കുള്ള പ്രകടനം പുറത്തെടുത്താൽ തീ പാറുന്ന പ്രകടനത്തിന് ആവും ഫുട്ബോൾ ലോകം സാക്ഷ്യം വഹിക്കുക.

മറുവശത്ത്,ഡോർട്മുണ്ട് അത്ര നല്ല ഫോമിൽ അല്ല. ബുണ്ടസ് ലീഗയിൽ അവർ അടുത്ത വർഷത്തെ ചാമ്പ്യൻസ് ലീഗിന് യോഗ്യത നേടുമോ എന്ന് പോലും സംശയത്തിൽ ആണ്. പരിക്ക് കാരണം ജെയ്ഡൻ സാഞ്ചോയും, വിറ്റ്സലും ഇന്ന് ഡോർട്മുണ്ട് നിരയിൽ ഉണ്ടാവുകയും ഇല്ല. എന്നാൽ ഹാലണ്ടിൻ്റെ ഒറ്റയാൻ പ്രകടനം ഏതു കളിയുടെയും ഫലം മാറ്റാൻ പോന്നതാണ്. അതിൽ തന്നെയാകും ഡോർട്മുണ്ടിന്റെ പ്രതീക്ഷയും.

ഇന്ന് രാത്രി 12.30നണ് ഇരു മത്സരങ്ങളും. സോണി നെറ്റ് വർക്കിൽ തത്സമയം കളി കാണാം.